Kosova, 11 vite e pavarur – Politika shqiptare, mesazhe urimi në këtë përvjetor
Kosova feston 11 vite pavarësi. Urimet për këtë përvjetor nuk kanë munguar as nga krerët e politikës shqiptare, të shprehura përmes mesazheve në rrjetet sociale.
Kosova feston 11 vjetorin e pavarësisë së saj. Festimet për pavarësinë kanë nisur që një ditë më parë dhe kanë vazhduar me fjalime nga krerët kryesorë të politikës të shoqëruar me parada përshëndetëse. Në këtë ditë të rëndësishme nuk kanë munguar as urimet nga politikanët shqiptarë.
Presidenti i republikës së Shqipërisë, Ilir Meta, ka shpërndarë në rrjetin social facebook dy fotografi të shkrepura në zyrën e kongresmenit Eliot Engel, kryetar i komisionit për politikën e jashtme në kongresin amerikan. Në njërën nga fotot shfaqet presidenti Meta teksa sheh kopjen e deklaratës së pavarësisë së Kosovës duke e quajtur një moment të paharrueshëm momentin e fiksimit të kësaj fotoje në zyrën e kongresmenit.
Po ashtu, që në orët e para të ditës, Kryeministri Edi Rama përmes një postimi në facebook ka uruar shtetin e Kosovës për këtë 11 vjetor .“Dhe me urimin për ditëlindjen e shtetit të Kosovës, ju dëshiroj një të diele të bukur të gjithëve “ –përfundon urimin Kryeministri Rama.
Arritje të dytë më të madhe kombëtare të historisë së shqiptarëve, kështu e ka konsideruar kreu i partisë Demokratike Lulzim Basha ditën e shpalljes së pavarësisë së Kosovës. Në një reagim në Facebook Basha shprehu urimet për të gjithë qytetarët dhe ata që sakrifikuan për këtë ditë duke theksuar se kjo duhet të shërbej si amanet për të gjithë që me vendosmëri, përkushtim dhe qartësi strategjike të vazhdojmë rrugëtimin e përbashkët në mbrojtje dhe fuqizimin e pavarësisë, sovranitetit dhe vlerave e të ardhmes euroatlantike të Kosovës .
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.