Kosova 13 vite pavarësi! Osmani dhe Kurti vizitë tek varrezat e Jasharëve: “Çmimi i lirisë është shumë i lartë”
Në këtë 17 shkurt Kosova feston 13 vjetorin e saj të pavarësisë. Presidentja e Kosovës dhe kryeministri i zgjedhur Albin Kurti nderuan kujtimin e Jasharëve, si akti simbolik për ditën e Pavarësisë së Kosovës.
Në fjalën e mbajtur Albin Kurti u shpreh se ky vend përkujton se sa i lartë është çmimi i lirisë.
“Prekazi heroik është vendi i kushtrimit për çlirim. Vendi që na përkujton se sa i lartë është çmimi i lirisë dhe se sa të privilegjuar jemi ne që jetojmë e festojmë 13-vjetorin e Pavarësisë së Kosovës, që i ka rrënjët në gjakun e dëshmorëve dhe martirëve të kombit tonë. Tre breza të familjes Jashari luftuan e u sakrifikuan. Gjysma e tyre të rënë burra e gjysma tjetër gra e fëmijë. Duke u rikthyer këtu ne bëjmë më të fuqishëm shtetndërtimin demokratik, zhvillimin socio-ekonomik, e drejtësinë institucionale, sepse i tillë është amaneti i dëshmorëve dhe dëshira e nevoja e qytetarëve”, tha Kurti.
Ndërkohë Osmani deklaroi se ky vend shërben si dëshmi që i kujton të gjithëve gjenocidin serb.
“Bashkërisht e nderojmë vendin që është ikonë e lirisë. Vendin ku prehen komandanti legjendar Adem Jashari dhe gjithë familja Jashari që janë simbol i sakrificës sublime të luftës së popullit shqiptar për liri. Është vendi ku çdo ditë do t’ia përkujtojmë vetes dhe botës se këtu gjenden dëshmitë e gjenocidit serb, dëshmitë e qëllimit të Serbisë për shfarosjen e popullit shqiptar”, ka thënë Osmani.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.