Kosova feston sot 9 vjetorin e Pavarësisë. Urime edhe nga krerët më të lartë të shtetit shqiptar
Republika e Kosovës sot feston 9 vjetorin e Pavarësisë. Në këtë ditë të rëndësishme janë planifikuar aktivitete të shumta në të gjitha qytetet e Kosovës.
Kreu i qeverisë kosovare Isa Mustafa, ka thënë se 17 Shkurti 2008, është futur në historinë e Kosovës, falë kontributit me dekada të punës, vizionit dhe përkushtimit të popullit për të jetuar i lirë dhe i barabartë me vendet tjera të botës.
Në nëntor 2005 filloi zyrtarisht procesi për vendosjen e statusit përfundimtar të Kosovës. Nga viti 1999, pasi forcat serbe u detyruan të linin Kosovën, ajo ishte e administruar nga misioni i Organizatës së Kombeve të Bashkuara UNMIK, dhe institucionet demokratike të Kosovës: Kuvendi, Presidenti dhe Qeveria e Kosovës.
Më 2 shkurt 2007 i dërguari special për statusin e Kosovës, Martti Ahtisaari, dorëzoi propozimin e tij në Prishtinë dhe Beograd. Pas disa bisedimeve Kosova u shpall, më 17 shkurt 2008, shtet i pavarur.
Urimet nga Shqipëria
Presidenti Nishani uron Presidentin Thaçi me rastin e 9-vjetorit të Pavarësisë së Republikës së Kosovës. Nishani i ka dërguar një mesazh urimi Presidentit Hashim Thaçi në të cilin shkruhet:
“I nderuar Zoti President. Me rastin e 9-vjetorit të pavarësisë së Republikës së Kosovës, kam kënaqësinë e veçantë që, në emrin tim dhe të popullit shqiptar, të përcjell urimet më të përzemërta e vëllazërore, për Ju dhe të gjithë shtetasit e Kosovës.Përfitoj nga rasti të përshëndes gjithashtu, të gjitha arritjet e deritanishme të Republikës së Kosovës dhe qytetarëve të saj për ndërtimin e shtetit të pavarur dhe funksional të Kosovës, si dhe kontributin e rëndësishëm të dhënë në funksion të paqes, sigurisë dhe zhvillimit të rajonit. Jam i bindur se falë këtij progresi, por edhe mbështetjes domethënëse të partnerëve, Kosova shumë shpejt do të bëhet anëtare aktive e organizatave më të rëndësishme ndërkombëtare, si dhe do të avancojë krahas vendeve të tjera të rajonit, në agjendën e saj evropiane. Marrëdhëniet ndërshtetërore mes Shqipërisë dhe Kosovës, janë shumë të veçanta dhe të një rëndësie thelbësore, si për të ardhmen e kombit shqiptar ashtu edhe për stabilitetin dhe përparimin e rajonit. Ndaj dhe ju siguroj se Shqipëria, bazuar në frymën dhe vizionin evropian e euroatlantik, do të jetë gjithnjë në krah të Kosovës në rrugën e saj të zhvillimit dhe do ta mbështesë pa asnjë rezervë në ruajtjen e pavarësisë, sovranitetit dhe integritetit shtetëror.Me urimet më të mira e vëllazërore në këtë ditë të shënuar, ju lutem pranoni, Zoti President, shprehjen e konsideratës sime më të lartë”, shkruan Nishani.
Në ditën e Pavarësisë së Kosovës urime kanë ardhur edhe nga liderë të politikës shqiptare. Kështu në rrjetin social Facebook, kreu i PD Lulzim Basha shkruan:
“Sot në vitin e nëntë te Pavarësisë se Kosovës, të dytën ditë me të rendësishme të historisë sonë kombëtare, dua të uroj nga zemra vëllezërit dhe motrat e Kosovës. Nëntë vite të Pavarësisë së Kosovës nuk kanë qenë vite të lehta. Vështirësi të shumta kanë sfiduar udhën e saj drejt projektit te shtetformimit. Por pjekuria e durimi, forca, mençuria, besimi i pashterë te liria, respekti fisnik ndaj tipareve më të vyera kombëtare me të cilat ju të dashur vëllezër dhe motra keni përballuar këto sfida do të shkruhen ne faqen e krenarisë sonë kombëtare.
Të dashur vëllezër e motra të Kosovës. Çdo sukses i juaji është sukses i ynë, çdo hap i juaji përpara na rrit dhe ne, çdo dhimbje lëndon njësoj. Rruga që kemi përpara është ende e mbushur me sfida. Realizimi i aspiratës tonë kërkon ende sprova e pas çdo sprove rritet qartësia dhe vizioni se jemi në rrugën dhe anën e drejte të historisë. Ne këtë ditë të përvjetorit të nënte te pavarësisë më lejoni që bashkë me urimet e gëzimin të ndaj me ju një premtim, se çdo orë, çdo ditë e jetës dhe e punës time, sot në krye të opozitës e nesër në krye të qeverisjes së vendit, Kosova dhe aspirata jone e përbashkët drejt integrimit do të jetë misioni ynë i madh, busulla orientuese më e qartë, energjia që do të ushqejë çdo hap tonin përpara. Ne do te jemi bashkë në këtë rrugëtim, së bashku do t’ia dalim. Gëzuar Ditën e Pavarësisë Kosovë!” shkruan lideri Demokrat Basha.
Sot ne vitin e nente te pavaresise se Kosoves, te dyten dite me te rendesishme te historise sone kombetare, dua te uroj…
Posted by Lulzim Basha on Friday, February 17, 2017
Nga ana tjetër, kreu i Bashkisë së Tiranës, Erion Veliaj ka zgjedhur të bëjë urimin me foton e e dy vëllezërve që njëri mban flamurin shqiptar dhe tjetri flamurin e Kosovës “Gëzuar Pavarësinë Kosove! Me dashuri nga Tirana!”, shkruan Veliaj
Gëzuar Pavarësinë Kosovë! 🇦🇱🇽🇰Me dashuri nga Tirana! 👏👏👏
Posted by Erion Veliaj on Thursday, February 16, 2017
Osman Dedja/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.