Kosova merr zyrtarisht kryesimin e CEFTA-s për vitin 2018
Kosova ka marrë zyrtarisht kryesimin e CEFTA-s për vitin 2018. Diskutimi i prioriteteve dhe qëllimeve të CEFTA-s nën udhëheqjen e saj u zhvillua të mërkurën në Bruksel.
Gjatë takimit ambasadori i Kosovës në BE, Bernard Nikaj, që do të jetë edhe kryetari i radhës i CEFTA-s tha se përmirësimi i bashkëpunimit rajonal dhe rritja e tregtisë do të jenë përparësitë e CEFTA-s nën udhëheqjen e Kosovës.
Aktualisht, zbatimi i marrëveshjes së tregtisë së lirë në rajon përballet me një sërë sfidash që përfshijnë kufizime serioze të vendosura nga Serbia dhe Bosnje Hercegovina për lëvizjen e lirë, mosnjohjen e diplomave dhe certifikatave arsimore, si dhe mungesën e mekanizmave që mund t’i nxisë anëtarët për të përmbushur kushtet e CEFTA-s në lidhje me lehtësimin e tregtisë.
Barbara Banki, Udhëheqëse e Njësisë në Drejtorinë e Përgjithshme në Komisionin e BE-së përgjegjës për Negocimet e Fqinjësisë dhe Zgjerimit, e cila gjithashtu mori pjesë në diskutim, përsëriti angazhimin e BE-së drejt ndaj rajonit duke u shprehur se Komisioni është duke përgatitur një strategji për Ballkani Perëndimor i cili do të rifillojë procesin për integrimin europian.
CEFTA është një marrëveshje e tregtisë së lirë midis vendeve jo-anëtare të BE-së që ka për qëllim nxitjen e zhvillimit socio-ekonomik përmes rritjes së tregtisë dhe promovimit të investimeve. Aktualisht, anëtarët e saj përfshijnë Shqipërinë, Serbinë, Kosovën, Malin e Zi, Bosnjën dhe Hercegovinën dhe Moldavinë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.