Kosova nuk heq taksën 100% me Serbinë! Albin Kurti shpjegon dhe kërkon falje për seancën e djeshme: Nuk respektuam distancën e sigurisë
Kosova nuk ka hequr taksën 100% për produktet serbe për shkak se nuk u arrit konsensusi në koalicionin qeveritar. Në një postim në rrjetet sociale Albin Kurti kërkon falje dhe shpjegon arsyet.
“Sot, me datë 15 mars 2020, është dashur që të hiqet tarifa 100% në lëndën e parë që importohet nga Serbia. Kjo nuk do të ndodhë sepse qëndrimi im i shprehur më 27 shkurt 2020 ndërkohë nuk u bë vendim. Më vjen keq për këtë. Ende nuk kam arritur ta bind partnerin tonë të koalicionit qeverisës, LDK-në, për atë që vetë jam i bindur: zëvendësimi gradual i tarifës me reciprocitetin është mënyra më e mirë, më e drejtë dhe më e dobishme” shkruan Kurti.
Po ashtu, Kurti ka kërkuar falje për seancën e djeshme ku nuk u respektua distance e sigurisë si masë kundrë përhapjes së koronavirusit.
“Seanca e djeshme e Kuvendit të Republikës së Kosovës që nisi pasdite e përfundoi pas mesnate, nuk respektoi urdhëresat për distancë fizike mbi një metër midis njerëzve në kohën e pandemisë së virusit Corona. Me zëvendës-kryeministrat e mi tërë kohën isha më afër se aq, e nganjëherë edhe përgjatë bisedave të ndryshme teksa diskutonim mbi buxhetin 2020 të cilin e aprovuam mbrëmë. Më vjen keq për këtë dhe ju kërkoj falje” shkruan Kurti.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.