Kosova, rritja ekonomike në 4.2% – Guvernatori i Bankës Qendrore, Mehmeti: Presim të njëjtin ritëm edhe në vitin 2020
Guvernatori i Bankës Qendrore të Kosovës, Fehmi Mehmeti, në daljen e fundit për këtë vit deklaroi se në vitin 2019 rritja ekonomike ka qenë 4.2% dhe ka ardhur për shkak të rritjes së investimeve dhe eksportit neto. Në konferencën përmbyllëse për vitin 2019 u shpalosën të dhëna mbi ecurinë e ekonomisë dhe sektorit bankar në vend. “Sipas vlerësimeve të Bankës Qendrore të Kosovës rritja ekonomike në vend për vitin 2019 vlerësohet të jetë 4.2 për qind, e mbështetur kryesisht nga investimet dhe rritja e eksporteve neto.
Rritje e ngjashme ekonomike planifikohet të jetë edhe viti i ardhshëm”, tha Mehmeti. Ai theksoi se gjatë këtij viti ka pasur edhe rritje të inflacionit dukshëm më shumë sesa gjatë vitit të kaluar. “Norma mesatare e inflacionit vjetor me të dhënat që kemi ne në dispozicion deri në nëntor të vitit 2019, shënon 2.8%, e që është dukshëm më e lartë nëse e krahasojmë me normën e inflacionit që ka qenë një vit më herët, e cila ka shënuar 0.9% deri në të njëjtën periudhën. Kjo rritje e inflacionit kryesisht është rezultat rritjes së çmimeve të ushqimit”, tha ai.
Duke folur për sektorin bankar, Mehmeti tha se ai edhe sivjet karakterizohet nga një rritje e kreditimit, përmirësim të qasjes në financim dhe rritje të lartë të qëndrueshmërisë financiare. Sipas të dhënave të BQK-së, deri në fund të vitit 2019, kreditë kanë arritur në 2.98 miliardë euro, në rritje vjetore prej 10%. “Burim kryesor i financimit për aktivitetin bankar konsiderohet të jenë depozitat, të cilat shënojnë vlerën 3.75 miliardë euro ose rritje prej 16 për qind”, tha Mehmeti duke shtuar se “kjo rritje e depozitave mes të tjerash shënon edhe besueshmërinë e lartë që ky sektor e ka tek publiku”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.