Kosovë, lehtësitë që ofrohen për eksportet në Zvicër dhe Norvegji. Procedura dhe dokumentet që duhet të kenë eksportuesit
Dogana e Kosovës ka filluar aplikimin e sistemit REX në kuadër të skemës GSP (General System of Preferences) e cila i ofrohet vendeve në zhvillim, në këtë rast Kosovës, për eksporte në Zvicër dhe Norvegji.
Ky sistem u mundëson subjekteve në Kosovë që eksportojnë mallra në Zvicër dhe Norvegji që të regjistrohen nga Dogana e Kosovës në këtë sistem dhe më pas të kenë mundësi që për mallrat që i prodhojnë dhe eksportojnë në këto dy vende, të lëshojnë vetë deklaratë ose faturë mbi origjinën, pa pasur nevojë të pajisen me certifikatë të origjinës FORMA A. Funksionimi i plotë i këtij sistemi ka filluar nga data 1 janar 2017.
Lajmi është dhënë nga ministri i Financave të Kosovës, Avdullah Hoti në një postim në rrjetin social Facebook. Në këtë postim ai ka shkruar:
“Periudha tranzitore nga metoda e certifikimit me certifikatën FORMA A (siç ka qenë) në metodën e certifikimit përmes sistemit REX do të zgjasë një vit me mundësi shtyrje për gjashtë muaj të tjerë, periudhë pas të cilës çdo eksportues që dërgon mallra me origjinë nga Kosova në këto dy vende, nuk mund të bëjë një gjë të tillë pa qenë i regjistruar. Prandaj njoftohen të gjithë prodhuesit nga Kosova që eksportojnë mallra me origjinë të Kosovës në Zvicër dhe Norvegji dhe dëshirojnë të përfitojnë nga skema e Sistemit Gjeneral të Preferencave, të plotësojnë formularin i cili gjendet në faqen e doganave. Gjithashtu të vijnë të paraqiten pranë sektorit të origjinës, në zyrat e Doganës së Kosovës në Prishtinë në mënyrë që të regjistrohen në sistem. Pas regjistrimit do të merrni numrin e regjistrimit, të cilin duhet ta vendosni tek deklarimi fatural.”, shkruan Hoti.
Për më shumë informacion dhe për kryerjen e regjistrimit mund të klikoni këtu:
Njoftim për eksportuesit Kosovar Dogana e Kosovës ka filluar me aplikimin e sistemit REX në kuadër të skemës GSP…
Posted by Avdullah Hoti on Saturday, March 11, 2017
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.