Kosovë / Vetëvendosje vijon aksionin opozitar. Albin Kurti njofton protestë në 12 qershor për zgjedhje të parakohshme
Lëvizja Vetëvendosje ka njoftuar se në datën 12 qershor do të zhvillojë një tubim paqësor në sheshin “Shkënderbeu” në Prishtinë.
Tubimi i njoftuar nga kryetari i Lëvizjes, Albin Kurti është një vijim i aksionit opozitar për të kërkuar zgjedhje të reja në Kosovë, pas krijimit të qeverisë Hoti në Kosovë, e vulosur edhe nga Gjykata Kushtetuese.
“Tubim në Sheshin “Skënderbeu”, të premten me 12 qershor. Në mbledhjen e sotme me Qendrat e Lëvizjes VETËVENDOSJE! Diskutuam për shumë çështje politike dhe organizative. Nga data 10 qershor 2020 e deri më 17 qershor 2020 mbahet “Java e Lëvizjes”, organizim yni ky tradicional i përvitshëm me aktivitete të shumta. Në veçanti Qendrat tona shprehën gatishmërinë dhe interesimin që 21 vjetori i çlirimit të Kosovës dhe 15 vjetori i VETËVENDOSJE!-s, të premten e ardhshme të 12 qershorit 2020, të shënohet me një tubim publik, duke e mbajtur distancën, në Sheshin ‘Skënderbeu’ në Prishtinë.”
Fillimisht, Vetëvendosje ka zhvilluar peticione në qytetet kryesore, ku ka treguar se ka mbledhur firma në numër rekord që kërkojnë zhvillimin e Zgjedhjeve të Reja nga qytetarët.
Sipas kësaj force politike vetëm zgjedhjet e reja mund t’i japin legjitimitetin një qeverie të re, ndërsa e kanë cilësuar koalicionin aktualisht në pushtet si në shërbim të interesave të presidentit.
Gjithashtu Albin Kurti nuk pranoi ceremoninë e dorëzimit të detyrës ndaj kryeministrit të ri Hoti, ndërsa vendimin e Gjykatës Kushtetuese e ka cilësuar si të ‘papranueshëm’ dhe se nuk reflekton vullnetin e popullit.
Mocioni i mosbesimit ndaj qeverisë së tij erdhi pas shkarkimit të Ministrit të Brendshëm nga radhët e LDK-së, i cili mbajti anën e presidentit Thaçi në shpalljen e gjendjes së jashtëzakonshme mbi krizën e COVID-19.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.