Kosto e Brexit për bankat – $30 mld deri në $50 mld shtesë kapitali

Bankave do t`iu nevojiten 30 deri në 50 miliardë dollarë kapital shtesë pas daljes së Britanisë nga Bashkimi Europian.

Këto para janë të domosdoshme për të mbështetur njësitë që do të operojnë në vendet e unionit në rast të asaj që njihet si “hard Brexit”, pra ndarjes së ashpër mes Brukselit dhe Londrës, që përkthehet në lënien jashtë të Britanisë nga tregu i përbashkët dhe humbjen e të gjitha privilegjeve që burojnë nga të qenit anëtar i saj.

Kjo shumë parash është e barabartë me 15% deri në 30% të kapitalit që bankat aktualisht kanë në rajon.

Nga ana tjetër, vetëm kostot operative pritet t`i kushtojnë bankave 1 miliardë dollarë.

Pjesa dërrmuese e operacioneve aktualisht kryhen në Londër, por me brexit ato do të duhet të zhvendosen në një prej qyteteve europiane.

Humbja e aksesit në tregun e përbashkët do të nxiste largimin nga Britania të rreth 35 mijë vendeve të punës në sektorin financiar.

Negociatat mes Brukselit dhe Londrës deri më tani kanë rezultuar shterpë dhe kanë ngecur që në pikën e parë, atë të faturës që Brukseli kërkon nga Londra që të paguajë, prej rreth 100 miliardë euro.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.