Kostot e ndërtimit – Rriten për të katërtin tremujor radhazi
Kostot e ndërtimit u rritën për të katërtin tremujor radhazi. Sipas të dhënave nga Instituti i Statistikave, indeksi i kostove në ndërtimin e banesave për tremujorin e dytë 2017 u rrit me 0.8% kundrejt të njëjtës periudhë të një viti më parë. Për tremujorin e dytë, rritja është lehtësisht më e ulët krahasuar me rritjen prej 0.9% të tremujorit të parë.
Ndonëse ende në vlera modeste, rritja e kostove të ndërtimit po rritet në mënyrë të qëndrueshme për herë të parë që nga vitit 2013.
Rritja, sado e kufizuar, po përcaktohet kryesisht nga grupi i shpenzimeve materiale, por edhe një rritje më e lartë në shpenzimet për paga. Në veçanti, zëri i shpenzimeve për paga regjistroi një rritje vjetore me 2.5%. Kjo është rritja më e lartë e regjistruar në katër vitet e fundit.
Kostot e shpenzimeve materiale për tremujorin e dytë regjistruan një rritje prej 1.6%, po aq sa në tremujorin paraardhës.
Këtë tremujor rritja erdhi nga shtrenjtimi i materialeve të ndërtimit, ndërsa një efekt balancues dha ulja e kostove për materialet elektrike dhe ato hidro-sanitare.
Kostot e transportit ende kanë një kontribut negativ në indeks, por rënia po ngushtohet tremujor pas tremujori. Për tremujorin e dytë 2017, kostot e transportit ranë me 1.5%, nga 2% që kishte qenë rënia në tremujorin paraardhës.
Megjithëse kostot e ndërtimit po rriten, kjo rritje është ende shumë e dobët për të shkaktuar presione për rritje të çmimeve të banesave nga krahu i ofertës. Tregu i pasurive të paluajtshme është gjallëruar disi në dy vitet e fundit, i mbështetur nga përmirësimi i ekonomisë dhe nga lehtësimi i kredisë bankare.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.