Kostot e TEC-it të Vlorës – S’është prodhuar asnjë kW energji, por duhen shlyer dhe 65 mln euro
Pavarësisht se Termocentrali i Vlorës nuk është vënë asnjëherë në punë, ai prodhon miliona euro kosto për Korporatën Elektroenergjitike Shqiptare, e cila vazhdon të shlyejë kreditë e marra në kohën e ndërtimit të tij. Sipas të dhënave zyrtare, KESH ka shlyer vetëm një pjesë të vogël të kredive, ndërsa mbeten për t’u likuiduar dhe rreth 65 mln euro të tjera.
Banka Botërore dhe BERZH kanë financuar projektin me 78 mln euro, ndërkohë që deri në muajin janar të vitit 2019 është shlyer vlera prej rreth 28 mln euro. Gjithashtu, Banka Europiane e Investimeve financoi projektin me një kredi prej rreth 24.7 mln dollarë, nga e cila mbeten për t’u likuiduar dhe 18.8 mln USD.
Por, përveç këtyre kostove, Termocentrali i Vlorës ka gjeneruar miliona euro kosto edhe për mirëmbajtjen e tij, duke qenë se është në konservim. Sipas Ministrisë së Infrastrukturës dhe Energjisë, aktualisht kostot e mirëmbajtjes shkojnë në 1 mln euro në vit, ndërkohë që në vitet 2012-2013 kanë qenë 1.5 mln euro në vit.
Aktualisht, ministria ka hapur garën e koncesionit, duke shpresuar lidhjen e kësaj vepre energjetik me gazin, si e vetmja mënyrë e vlerësuar nga studimi i fizibilitetit dhe ekspertët ndërkombëtarë për ta vënë në punë. Sipas studimit të fizibilitetit, vlera e koncesionit për rehabilitimin dhe vënien në funksion të Termocentralit të Vlorës pritet të jetë 72 mld lekë apo rreth 59 mln euro.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.