Kredi 25 milionë euro për spitalet – Huaja nga Banka Botërore, pas mbështetjes për rindërtimin e objekteve shëndetësore!

Ministria e Shëndetësisë dhe Mbrojtjes Sociale do të marrë një kredi prej 25 mln euro, që do të shkojë për përmirësimin e sistemit shëndetësor. Marrëveshja e huasë ka mbërritur në Kuvend për diskutim, ndërkohë që sipas relacionit shoqërues ajo vjen pas mbështetjes në po të njëjtën vlerë të dhënë nga Banka Botërore për rindërtimin e objekteve shëndetësore, pas tërmetit të 26 nëntorit.

Sipas të njëjtit dokument, financimi shtesë në vlerën 25 milionë euro do të mundësojë përshkallëzim të mëtejshëm të aktiviteteve të projektit mëmë dhe do të sigurojë ndikim të drejtpërdrejtë te përfituesit dhe përmirësim të mëtejshëm të ofrimit të shërbimit të kujdesit.

Më konkretisht, parashikohet që kjo vlerë të shkojë në mbështetje të reformës spitalore, që rrjedh nga masterplani i spitaleve, si një parakusht për racionalizimin e nivelit dytësor të kujdesit shëndetësor në vendin tonë dhe përmirësimin e mëtejshëm të efikasitetit e përmirësimit të cilësisë së spitaleve.

“Qëllimi i mësipërm do të mundësohet, nëpërmjet racionalizimit të spitaleve të mëdha, transformimit të aktiviteteve dhe shërbimeve spitalore aktuale në një institucion shëndetësor më dinamik dhe më efikas, duke përdorur një qasje të integruar që adreson rehabilitimin e infrastrukturës, pajisjet modern diagnostike dhe optimizimin e personelit të kujdesit shëndetësor”, – thuhet ndër të tjera në relacion.

Pas tërmetit të vitit 2019 Banka Botërore u angazhua për mbështetje në vlerën e 25 milionë eurove për rindërtimin e objekteve shëndetësore, në kuadër të programit qeverisës 2021-2025, ku rindërtimi është një nga shtyllat kryesore të financimit.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.