Kredi deri në 300 mln lekë për bizneset – Garancia sovrane/ Afati i huasë deri në 5 vjet, normë preferenciale interesi

Qeveria shqiptare ka përcaktuar detajet dhe kriteret e përfitimit nga garancia sovrane prej 15 miliardë lekësh e cila i vihet në dispozicion bankave tregtare që të mundësojnë huadhënien për bizneset për të siguruar fondet e nevojshme për kapital qarkullues dhe investime, me qëllim rimëkëmbjen e aktivitetit tregtar, pas pasojave të shkaktuara nga COVID-19.

Sipas vendimit të publikuar në Fletoren Zyrtare Ministria e Financave merr përsipër të garantojë 60% të principalit të çdo Huaje që Huadhënësi do t’u lëvrojë Huamarrësve sipas kushteve që pasojnë në këtë Marrëveshje dhe në asnjë rast, nuk merr përsipër garantimin e interesave, kamatëvonesave, penaliteteve apo çdo lloj detyrimi tjetër monetar, që mund të burojë nga kreditë e dhëna për këtë qëllim. Në vendim citohen se përfitues të këtyre kredive, janë subjektet tregtare ose shoqëri tregtare të regjistruara në QKR, të cilët nuk duhet të kenë nuk duhet të ketë detyrime tatimore të papaguara për 3 periudhat tatimore, deri në Shkurt 2020;  si dhe nuk duhet të ketë aplikuar dhe të kenë marrë ndonjë hua tjetër që mbulohet nga kjo skemë garancie.

Vlera e Huasë e vendosur në dispozicion nga bankat për bizneset mund të variojë në përputhje me kërkesën e paraqitur nga Huamarrësi, por në asnjë rast nuk do të jetë më e lartë se 300 milionë lekë. Po ashtu, në vendim thuhet se në asnjë rast shuma e huave me vlerë më të lartë se 150 milion lekë nuk duhet të jetë më e lartë se 50% e shumës së Huave të akorduara nën këtë Marrëveshje.  Afati i kredisë do të vendoset mes palëve, por duke mos tejkaluar në asnjë rast afatin prej 5 vite.

Vendimi përcakton se periudha pa pagesë principali nuk do të jetë më pak se 6 muaj, me përjashtim të rasteve kur biznesi preferon një periudhë më të shkurtër; kreditë do të jepen vetëm në lekë dhe me një normë vjetore interesi  vjetore preferenciale, të barabartë me normën mesatare të interesit të tre bonove të thesarit 12 mujore më të fundit të emetuara nga Qeveria dhe një marzh deri në 3.0% në varësi të afatit të Huasë dhe produktit me të cilin do të ofrohet Huaja. Norma vjetore e interesit do të jetë e ndryshueshme mbi bazë vjetore në varësi të referencës/indeksit, por duke parashikuar shprehimisht që në asnjë rast norma vjetore e interesit të mos tejkalojë vlerën prej 5.0%.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.