Kredia, 2018 u mbyll në rënie – 18 mld lekë më pak krahasuar me një vit më parë
Portofoli i kredisë për ekonominë u zvogëlua edhe gjatë dhjetorit të kaluar, duke mbyllur një tjetër vit kalendarik në rënie. Sipas të dhënave nga Banka e Shqipërisë, në fund të vitit të kaluar kredia kishte vlerën e 532.6 miliardë lekëve. Gjatë muajit dhjetor, portofoli i kredisë ra me dy miliardë lekë të tjera. Krahasuar me fundin e vitit 2017, portofoli i kredisë për ekonominë është tkurrur me afro 18 miliardë lekë ose 3.2%. Rënia i detyrohet pjesërisht efektit statistikor të mbiçmimit të lekut në kursin e këmbimit, që e ka ulur vlerën e konvertuar të kredisë në euro.
Gjithashtu, sidomos në muajt e fundit të vitit, ndikim jep edhe fshirja e kredive të humbura, sipas kërkesave rregullatore të Bankës së Shqipërisë, megjithëse ndikimi i këtij faktori vlerësohet të ketë qenë modest krahasuar me vitet e mëparshëm. Vetëm segmenti i individëve duket të ketë një rritje vjetore të qëndrueshme dhe të shëndetshme. Kreditimi i biznesit ngelet i brishtë. Edhe gjatë dhjetorit, kredia në këtë segment ra me 2.5 miliardë lekë, ndërsa krahasuar me një vit më parë rënia është rreth 12 miliardë lekë.
Burimi: Banka e Shqipërisë
Megjithëse me të drejtë bankat po tentojnë ta diversifikojnë kreditimin në segmentin e shitjeve me pakicë, gjallërimi i kredisë për biznesin, sidomos për atë të madh, do të jetë i domosdoshëm për të rritur volume e huadhënies.
Totali i kredisë për ekonominë sot është në vlera të përafërta me fundin e vitit 2011. Gjatë shtatë viteve të fundit, kredia ka regjistruar vetëm rënie ose stanjacion. Në terma realë, kredia sot vlerësohet në rreth 32% të PBB-së, nga rreth 42% që zinte në vitin 2011. Megjithë uljen e raportit të kredive me probleme dhe një gjallërim të aktivitetit ekonomik, sërish kreditimi i biznesit është i dobët.
Vrojtimet e kryera nga banka qendrore tregojnë se bankat vazhdojnë të jenë konservatore në kredidhënie, sidomos kur bëhet fjalë për shuma të mëdha. Oferta më e shtrënguar për kredi lidhet edhe me ndryshimet strukturore brenda sistemit bankar. Disa banka të rëndësishme kanë qenë në procesin e shitjes së aksioneve dhe natyrisht që nuk kanë qenë të fokusuara te rritja.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.