Kredia, 87% e kërkesave miratohen – Shkalla e refuzimit është më e ulët te bankat me kapital shqiptar
Sistemi bankar shqiptar miraton 87% të aplikimeve për kredi. Banka e Shqipërisë ka nisur një vrojtim me bankat tregtare, për të krijuar një ide më të saktë rreth ecurisë së kërkesës dhe ofertës për kredi. Bankat raportojnë çdo 6-mujor informacion lidhur me numrin total të aplikimeve për kredi të marra, duke i klasifikuar në aplikime të pranuara, të refuzuara dhe në shqyrtim.
Për gjysmën e dytë të vitit të kaluar, rezultoi se 87% të aplikimeve u miratuan, vetëm 11% u refuzuan, ndërsa 2% ishin në proces shqyrtimi. Këto shifra tregojnë se shtrëngimi i kredisë bankare nuk duket të jetë në përmasat e perceptimit të krijuar vitet e fundit. Norma e refuzimit, në fakt, është rritur lehtë gjatë vitit të kaluar, por është ndjeshëm më e ulët krahasuar me nivelin e vitit 2016, kur Banka Qendrore nisi të mblidhte informacione për vrojtimin.
Të dhënat e zbërthyera tregojnë se luhatjet e shkallës së refuzimit mes bankave dhe grupeve të klientëve janë të konsiderueshme. Për bankat vendase, norma e refuzimit të kredisë është ndjeshëm më e ulët krahasuar me bankat e huaja, për të gjitha kategoritë e klientëve. Sipas shifrave të fundit, bankat shqiptare kanë refuzuar vetëm 7.4% të aplikimeve për kredi, ndërsa bankat e huaja kanë refuzuar një përqindje gati dy herë më të lartë, me 14.1%.
Një faktor që ka shumë ndikim është edhe përmasa e bankës ku aplikohet për kredi. Bankat e vogla, me më pak se 2% pjesë tregu, kanë një shkallë shumë të lartë të refuzimit të aplikimeve, që arriti në 41.5% vitin e kaluar. Ndërkohë, për katër bankat më të mëdha të sistemit, norma e refuzimit është shumë më e ulët, me vetëm 8.7%.
Sipas llojit të klientëve, shkalla më e ulët e refuzimit është në segmentin e ndërmarrjeve të vogla dhe të mesme, me 8.3%, ndërsa shkalla më e lartë për ndërmarrjet e mëdha, me 16.1%.
Vrojtimi gjithashtu jep një ide më të qartë rreth ecurisë së kërkesës së ekonomisë për kredi bankare. Vitin e kaluar, sektori bankar ka marrë rreth 100 mijë aplikime për kredi, në rënie me 2.2% krahasuar me vitin 2017. Ndërsa tek individët aplikimet janë rritur, mes ndërmarrjeve ato kanë rënë ndjeshëm, me 13% më pak. Këto shifra tregojnë se kredidhënia vazhdon të ketë probleme në krahun e kërkesës, sidomos kur bëhet fjalë për bizneset.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.