Kredia do të lehtësohet! Bankat parashikojnë më shumë ofertë këtë tremujor

Bankat parashikojnë të lehtësojnë kriteret e huadhënies në tremujorin e dytë të këtij viti. Mbështetur në rezultatet e vrojtimit të aktivitetit kreditues, standardet e huadhënies priten të jenë më të lehtësuara, si për bizneset, ashtu edhe për individët.

Ndërkohë, bankat presin gjithashtu rritje të kërkesës për kredi në të dy segmentet kryesore të tregut. Këto pritshmëri duket se japin një perceptim në përmirësim për huadhënien gjatë këtij viti. Optimizmi mbështetet edhe nga rezultatet e para të këtij viti.

Statistikat e Bankës së Shqipërisë tregojnë se në dy muajt e parë të vitit 2019 portofoli i kredisë për ekonominë u rrit me gati nëntë miliardë lekë. Ndikimin më përcaktues e ka dhënë gjallërimi i kredisë për bizneset, që në dy muajt e parë të vitit është rritur me rreth shtatë miliardë lekë. Ndërkohë, kredia për individët ka vijuar rritjen e qëndrueshme, në ndjekje të tendencës pozitive të viteve të fundit.

Vrojtimi i aktivitetit kreditues në fakt tregoi një shtrëngim të lehtë në standardet e kredisë për tremujorin e parë. Në kredinë për biznese, ky shtrëngim u shpreh kryesisht përmes një rritje të lehtë të marzheve të interesit. Ndërkohë, një shtrëngim të lehtë pati edhe në kredinë për blerje banesash për individët.

Sidoqoftë, duke pasur parasysh rritjen sasiore të kredisë në muajt e parë të vitit, ky shtrëngim nuk duket të ketë pasur ndonjë ndikim të rëndësishëm në ritmin e huadhënies. Nga ana tjetër, duke parë parashikimet e bankave për tremujorin e dytë, shtrëngimi relativ i tremujorit të parë duket se ka qenë i përkohshëm.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.