Kredia jashtë vendit – Ra me 3 miliardë lekë për vitin 2017
Kredia e dhënë jashtë vendit nga sistemi bankar shqiptar ka rënë gjatë vitit 2017, pas tre vitesh radhazi në rritje. Sipas të dhënave nga Banka e Shqipërisë, portofoli i kredisë për jorezidentët ra në 64.4 miliardë lekë, rreth tre miliardë lekë më pak krahasuar me fundin e vitit 2016.
Pesha e kredisë dhënë subjekteve jorezidente ka rënë në 11% të tepricës së kredisë në dhjetor 2017, nga 11.3% që shënonte një vit më parë.
Kredia e dhënë jashtë vendit shkon kryesisht për subjekte biznesi, me rreth 83% të gjithë kredisë për jorezidentët. Kredia në këtë segment ka rënë me 8% krahasuar me vitin 2016.
Duke qenë se kredia e dhënë për subjekte jorezidente është kryesisht në euro, një efekt në rënien e këtij portofoli mund të ketë edhe zhvlerësimi i monedhës europiane në kursin e këmbimit me lekun. Kredia për jorezidentët është kryesisht e përqendruara në pak banka të mëdha, që, gjatë viteve të fundit kanë kërkuar alternativa financimi në vendet e rajonit, duke pasur parasysh edhe kërkesën e dobët dhe problemet specifike të kreditimit të biznesit në Shqipëri. Kredia është dhënë në tregje ku efektet e krizës ekonomike në vitet e fundit janë ndjerë më pak, si për shembull në Kosovë dhe në Turqi.
Edhe falë rritjes së depozitave në euro, disa banka shqiptare kanë rritur kreditimin në tregjet e rajonit, ku marzhet janë mjaft të kënaqshme, ndërsa rreziqet relativisht më të ulëta krahasuar me tregun shqiptar.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.