Kredia nuk ndal “hapin” – Rritja arrin në 6.7% në fund të tetorit
Rritja e kreditimit të ekonomisë shqiptare nuk u ndal as në muajin tetor. Sipas Bankës së Shqipërisë, gjatë tetorit, portofoli i kredisë u zgjerua sërish me rreth 3 miliardë lekë. Në total, ai arriti vlerën e 568 miliardë lekëve, 6.7% më shumë krahasuar me tetorin e vitit të kaluar. Rritja e kreditimit është rezultat i njëkohshëm i disa faktorëve, që nga përmirësimi i kërkesës së tregut dhe deri te ulja së raportit të kredive me probleme dhe mbyllja e procesit të shitblerjeve brenda sistemit bankar, që e kanë rritur ofertën për kredi.
Segmenti i individëve vazhdon të udhëheqë rritjen e kreditimit, në ndjekje të një tendence pozitive disavjeçare. Ndërkohë, në segmentin e individëve, kreditimi po vijon tendencën pozitive të nisur prej disa vitesh. Në fund të tetorit, huaja bankare në këtë segment arriti në 196.1 miliardë lekë, në rritje vjetore me pothuajse 7%.
Ky segment vazhdon të jetë i preferuar nga sistemi bankar, që ka si objektiv afatgjatë një ulje të përqendrimit të huadhënies në segmentin e biznesit dhe një shpërndarje më të mirë të rrezikut kreditor. Shifrat tregojnë se raporti i kredive me probleme për individët është ndjeshëm më i ulët në raport me bizneset, sidomos për produktin më të rëndësishëm, kredinë për blerje banese.
Nga ana tjetër, edhe huaja për biznesin konfirmoi tendencën pozitive, të nisur sidomos pas mesit të këtij viti. Për tetorin, portofoli u zgjerua me rreth 700 milionë lekë, ndërsa rritja vjetore e portofolit ka kaluar kufirin e 5%. Kredia për bizneset private ngelet kolona kryesore e kreditimit të ekonomisë, me rreth 59% të portofolit total të huasë.
Veç rritjes sasiore, në vitet e fundit kredia është edhe më e orientuar drejt afateve të gjata të maturimit, e lidhur sidomos me rritjen e kredisë për investimin në pasuri të paluajtshme nga individët dhe bizneset. Koha më e gjatë mesatare e maturimit të kredive e bën rritjen më të qëndrueshme në kohë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.