Kredia për ekonominë – Në rënie edhe gjatë muajit maj
Kreditimi i ekonomisë pësoi rënie edhe gjatë majit, duke konfirmuar një ecuri mjaft të dobët në pjesën e parë të vitit. Sipas statistikave nga Banka e Shqipërisë, kredia arriti vlerën e 544.4 miliardë lekëve, me një rënie të mëtejshme prej rreth 1 miliard lekësh krahasuar me prillin. Me bazë vjetore, kredia është sërish në rënie, me 1.2% më pak ndaj të njëjtës periudhë të një viti më parë.
Megjithëse Banka e Shqipërisë në muajt e fundit raporton për rritje të kreditimit, kjo bëhet duke i shtuar portofolit edhe kreditë e fshira gjatë periudhës. Kreditë e fshira, nga njëra anë kanë ndihmuar në uljen e raportit të kredive me probleme, por, nga ana tjetër e kanë tkurrur edhe portofolin total të kredisë së sistemit bankar. Një faktor tjetër që mund të ketë një efekt të vogël në statistikat e kredisë është edhe kursi i këmbimit.
Duke qenë se raportimi bëhet në lekë, zhvlerësimi i euros në kursin e këmbimit e ul vlerën e konvertuar të portofolit të kredisë në monedhën europiane, që përbën rreth 60% të totalit. Në tërësi, kreditimi nuk ka sinjale për një përtëritje të shpejtë, me gjithë një ecuri pozitive në segmente të veçanta, sidomos tek kreditimi i individëve dhe tek kredia në monedhën vendase.
Kreditimi i biznesit ngelet ende një pikë e dobët, përcaktuese për rënien e kredisë. Në fund të majit, portofoli i kredisë për biznesin ishte në rënie me 4.3% ndaj të njëjtës periudhë të një viti më parë. Kredia për biznesin përbën rreth 62% të totalit, ndaj një rritje e mirëfilltë e kreditimit është shumë e vështirë pa zgjeruar huadhënien për sipërmarrjen.
Sidoqoftë, një faktor me ndikim të konsiderueshëm në frenimin e kreditimit kanë qenë edhe zgjedhjet e muajit qershor. Periudhat parazgjedhore në Shqipëri karakterizohen nga një sjellje hezituese e bizneseve në ndërmarrjen e investimeve të reja. Mund të shpresohet se, pas zgjedhjeve, edhe aktiviteti kreditues do të përmirësohet, në linjë me ecurinë pozitive të treguesve kryesorë makroekonomikë.
Ersuin Shehu/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.