Kredia për ekonominë – Në rënie edhe për marsin

Portofoli i kredisë për ekonominë u zvogëlua edhe gjatë muajit mars. Sipas të dhënave nga Banka e Shqipërisë, kredia për ekonominë ra në 548.2 miliardë lekë, rreth 1.7 miliardë lekë më pak krahasuar me shkurtin.

Vlera totale e kredisë për ekonominë ka ngelur pothuajse e pandryshuar krahasuar me të njëjtën periudhë të një viti më parë. Megjithëse kredia e re është rritur lehtë, kjo nuk ka mjaftuar për të siguruar një rritje domethënëse të portofolit total.

Kjo lidhet edhe me faktin që kredia për ekonominë në një pjesë të madhe ka maturim afatshkurtër, sidomos në pjesën që lidhet me kredinë për kapital qarkullues dhe overdraftet e biznesit.

Rrjedhimisht, ato maturohen shpesh dhe nuk garantojnë rritje afatgjatë të portofolit të kredisë për ekonominë. Politika e kreditimit afatshkurtër lidhet pjesërisht edhe me strukturën e depozitave, që gjatë viteve të fundit është zhvendosur drejt instrumenteve likuide, edhe për shkak të uljes së normave të interesit.

Por, pavarësisht nga faktorët specifikë, duke ende se faktori më thelbësor, kërkesa e sektorit privat për kredi, është ende e zbehtë. Pikërisht kredia për biznesin paraqet ecurinë më të dobët në terma sasiorë, në rënie me 2.6% krahasuar me një vit më parë.

Ndjeshëm më mirë po performon segmenti i individëve, ku kredia paraqitet në rritje vjetore me 5.1%. Megjithatë, kredia për individët zë pak më shumë se 30% të totalit të kredisë për ekonominë.

Volumet më të mëdha gjenerohen nga bizneset, ndaj huadhënia në këtë segment ngelet e domosdoshme për të nxjerrë kreditimin e ekonomisë nga stanjacioni.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.