Kredia për ekonominë – Portofoli në rënie për të tretin muaj radhazi

Portofoli i kredisë për ekonominë u tkurr sërish gjatë muajit prill, duke regjistruar të tretin muaj radhazi në rënie. Sipas të dhënave nga Banka e Shqipërisë, kredia ra në 546 miliardë lekë, rreth 2.3 miliardë lekë më pak krahasuar me marsin.

Vlera totale e kredisë për ekonominë është në vlera të përafërta me të njëjtën periudhë të një viti më parë. Kredia e re e dhënë gjatë prillit ishte ndjeshëm më e lartë se në mars, por në vlera më të ulëta krahasuar me prillin e vitit të kaluar.

Shifrat e deritanishme të vitit 2018 nuk tregojnë ndonjë përmirësim thelbësor të kreditimit krahasuar me vitin e kaluar. Rritja e mirë në segmentin e kredisë për individë, me një rritje vjetore të portofolit prej afro 6%, nuk po arrin të balancojë rënien e ndjeshme të kredisë për biznesin.

Megjithëse ekonomia shqiptare po rritet më shumë vit pas viti, duket se sipërmarrja në tërësi nuk po shfaqet e aftë të përthithë sasi të shtuara kredie nga sistemi bankar. Kërkesa e shëndetshme nga sektori privat për kredi është ende e zbehtë dhe ky duket të jetë faktori më thelbësor që po frenon rritjen e kreditimit.

Kjo padyshim që nuk përjashton edhe një ofertë ende të shtrënguar nga bankat, sidomos në segmentin e biznesit. Gjithashtu, zhvillimet strukturore që po ndodhin në sistemin bankar, për momentin, nuk e favorizojnë shumë rritjen e kreditimit.

Një pjesë e bankave kanë vendosur të largohen nga Shqipëria dhe janë në procesin e shitjes; disa banka të tjera lokale ndodhen në anën tjetër të tavolinës, të angazhuara në bisedime për të blerë bankat që po largohen.

Kjo situatë e ka zhvendosur përkohësisht fokusin e disa bankave nga rritja e natyrshme, përmes zgjerimit të kredisë apo aktiveve të tjera financiare.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.