Kredia për ekonominë/ Rënie e lehtë për janarin, por tendenca afatgjatë është pozitive
Kredia pësoi një rënie të lehtë gjatë muajit janar, megjithatë ngelet në ritme pozitive të rritjes vjetore. Të dhënat e Bankës së Shqipërisë tregojnë se portofoli i kredisë për ekonominë arriti në rreth 569 miliardë lekë, afërsisht dy miliardë lekë më pak krahasuar me fundin e dhjetorit 2019. Megjithatë, me bazë vjetore kredia ngelet në rritje, me 6% më shumë krahasuar me janarin e vitit të kaluar.
Segmenti më i shëndetshëm në kredidhënie ngelet ai individëve. Edhe për janarin u regjistrua një rirtje e lehtë, ndërsa me bazë vjetore rritja është pranë nivelit 6.5%. Portofoli i kredisë së individëve ka vlerën e rreth 196 miliradë lekëve ose rreth 1.6 miliardë eurove.
Ky segment vazhdon të jetë i preferuar nga sistemi bankar, që ka si objektiv afatgjatë një ulje të përqendrimit të kreditimit në segmentin e biznesit dhe një shpërndarje më të mirë të rrezikut kreditor. Normat e ulëta historike të interesit vazhdojnë të mbështesin një rritje të huamarrjes si për blerjen e banesave, ashtu edhe për konsum.
Kredia për biznesin ra lehtë gjatë janarit, duke qnë faktor përcaktues në frenimin e kredisë për ekonominë. Megjithatë edhe ajo ngelet në rritje vjetore pozitive, me 4% më shumë. Në vlerë, kredia për bizneset private ngelet shtylla kryesore e kreditimit, me rreth 59% të portofolit total të huasë.
Nëse kredia për individë tashmë dominohet bindshëm nga leku, te huaja për biznesin valuta mbizotëruese është ende euroja.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.