Kredia për individë-Arrin në 12.4% të PBB-së

Kredia për individë arriti në rreth 12.4% të Prodhimit të Brendshëm Bruto  në fund të tremujorit të tretë të vitit, me një rritje prej 0.3 pikësh përqindjeje nga e njëjta periudhë e vitit të kaluar. Në vlerë, portofoli i kredisë për individë është rritur me rreth 37 milionë euro, rritja më e lartë për këtë periudhë të vitit që pas shtrirjes së krizës financiare globale.

Duke përjashtuar efektin e kursit dhe të fshirjeve, në tremujorin e tretë kredia për individë ka shënuar rritje vjetore me rreth 7%, krahasuar me normën prej 6.4% në tremujorin e kaluar.

Bankat kanë raportuar vazhdimisht ofertë të përmirësuar për kredi, që, paralelisht me kërkesën në rritje për financim nga individët, kanë ndikuar në rritjen e qëndrueshme të këtij portofoli.

Banka e Shqipërisë vlerëson gjithashtu se me hyrjen në treg të bankave të reja gjatë vitit 2019, konkurrenca në tregun e kredisë është rritur.

Struktura e kredisë për individë dominohet nga portofoli i kredisë për blerje banesash. Në fund të tremujorit të tretë të vitit, ky portofol përbënte rreth 69% të kredisë për individë, për një vlerë totale prej rreth 935 milionë eurosh.

Por, megjithatë, gjatë dy viteve të fundit, kredia konsumatore e ka rritur peshën specifike, me rreth 2.5 pikë përqindje.

Kushtet më të lehtësuara të kredidhënies dhe, në veçanti ulja e normave të interesit kanë mbështetur një rritje të huasë për konsum.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.