Kredia për individë zgjeron rritjen mbështetur nga kredia për konsum

Kredia për individë ka përmirësuar normat e rritjes edhe gjatë tremujorit të fundit të vitit, me një rritje vjetore prej rreth 5.1% në muajt tetor-nëntor. Sipas Bankës së Shqipërisë, zgjerimi i portofolit të kredisë për individë është mbështetur si nga ana e kërkesës për kredi, ashtu edhe nga kushtet e përmirësuara të ofertës.

Kërkesa për kredi nga individët është nxitur nga forcimi i besimit konsumator, nga përmirësimi i kushteve në tregun e punës, si edhe nga rritja e të ardhurave të disponueshme. Në të njëjtën kohë, lehtësimi i vazhdueshëm i kushteve të kreditimit nga sistemi bankar ka favorizuar më tej kredidhënien në këtë segment.

Zhvillimet pozitive të kredisë për individë janë mbështetur sidomos nga zgjerimi i  kredisë për konsum. Ky portofol u shtua me rreth 11.4% në muajt tetor-nëntor, duke shënuar përmirësim të normës vjetore me 2.7 pikë përqindje nga tremujori i kaluar. Portofoli i kredisë për banesa ka shfaqur ngadalësim në normat vjetore të rritjes gjatë muajve tetor-nëntor, në 3.3%, kundrejt mesatares prej 3.6% në tremujorin e tretë të vitit.

Kreditimi në monedhë vendase vijon të mbështesë plotësisht zgjerimin e kredisë për individë. Stoku i kredisë në lekë shënoi rritje mesatare vjetore me 10.8% në muajt tetor-nëntor. Orientimi drejt lekut është mbështetur si nga normat e ulëta të interesit, ashtu edhe nga ndërgjegjësimi i individëve për rrezikun e kursit të  këmbimit.

Bankat janë shprehur optimiste edhe për zhvillimet e pritshme në tremujorin e parë të vitit 2017, teksa parashikojnë lehtësim të mëtejshëm të kushteve të kreditimit dhe rritje të kërkesës nga individët.

Ersuin Shehu/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.