Kredia për investime – Interesat në rënie për gjysmën e parë të vitit
Interesat e kredive për investime këtë vit janë në rënie. Sipas të dhënave nga Banka e Shqipërisë, për gjashtë muajt e parë të vitit interesi i kredive për blerje të makinerive dhe pajisjeve në lekë ishte mesatarisht 5.9%, nga 6.2% që kishte qenë në të njëjtën periudhë të një viti më parë.
Akoma më e dukshme është rënia e interesave për kredinë në euro, që zbritën në një mesatare prej 4.4%, nga 5.3% që ishin në gjysmën e parë të vitit të kaluar.
Interesat e ulëta po favorizojnë një ritëm të lartë të investimeve në ekonomi edhe gjatë këtij viti. Sipas Bankës së Shqipërisë, për tremujorin e dytë të vitit kredia për investime u rrit me 4.3% dhe ka qenë nxitësi kryesor i rritjes së kredisë për biznesin.
Sipas të dhënave nga Banka e Shqipërisë, në mesin e këtij viti portofoli i kredisë për blerje të makinerive dhe pajisjeve nga bizneset kishte vlerën e 91.5 miliardë lekëve. Ecuria e mirë e investimeve në ekonomi dëshmohet edhe rritja e importit të makinerive dhe pajisjeve. Sipas Instat, për shtatë muajt e parë të vitit importet e makinerive dhe pajisjeve u rritën me 9.5%.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.