Kredia për sektorin energjetik – Marrëveshja/100 milion euro hua nga KFW-ja, duhet të disbursohet brenda 8 muajsh

Disbursimi i kredisë prej 100 mln euro, që do të shkojnë për zbatimin e reformës në sektorin elektroenergjetik do të duhet të bëhet brenda marsit të vitit 2022. Ligji për miratimin e marrëveshjes se huasë, është publikuar në Fletoren Zyrtare, teksa përcaktohet se qëllimi është mbështetja e reformave të Qeverisë së Shqipërisë në sektorin energjetik. Sipas dokumentit të publikuar, do të jetë Ministria e Infrastrukturës dhe Energjisë dhe Kfw-ja, që do të përcaktojnë detajet

e Programit me një marrëveshje të veçantë  që do të nënshkruhet mes tyre e që do të veprojë si njësi zbatuese për komponentët që do të përdoret. Megjithatë, gjatë kohës së marrëveshja e kredisë diskutohej në komisionet parlamentare, përfaqësuesit e ministrisë së Financave dhe Ekonomisë dhanë detaje, duke bërë me dije se kjo shumë parashikohet të shkojë për financimin e disa komponentëve të reformës, sikurse është ndarja e Operatorit të Shpërndarjes së Energjisë Elektrike, ngritja e bursës apo krijimi i tregut me pakicë të energjisë.

Ndërkaq, zv.ministri i Infrastrukturës dhe Energjisë, Ilir Bejtja bëri me dije se aktualisht janë realizuar 75% e komponentëve të reformës në sektorin elektroenergjetik.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.