Kredia, viti nis pozitivisht – Rritje me 4 miliardë lekë për janarin
Viti 2019 nisi me sinjale pozitive për kreditimin e ekonomisë. Sipas Bankës së Shqipërisë, për janarin kredia arriti në 536.7 miliardë lekë, në rritje me afërsisht katër miliardë lekë që nga dhjetori. Megjithatë, me bazë vjetore kredia për ekonominë ngelet në rënie, me 2.6% krahasuar me një vit më parë.
Gjallërimi i kredisë në janar ka ardhur sidomos falë segmentit të biznesit. Kredia për kompanitë private u rrit me rreth tre miliardë lekë. Për shkak se biznesi thith volumet më të mëdha të kredisë, ky segment ngelet përcaktues për ringritjen e kredisë për ekonominë. Megjithatë, tregu ka vuajtur si një rënie të kërkesës për shkak të efekteve të krizës në tregje, ashtu edhe një ofertë të shtrënguar dhe një kujdes të lartë nga bankat. Kredia për biznesin përbën afërsisht 60% të kredisë totale për ekonominë.
Burimi: Banka e Shqipërisë
Në segmentin e individëve, kreditimi ka një tendencë pozitive të qëndrueshme në kohë. Portofoli i rrit edhe gjatë janarit, ndërkohë që është zmadhuar me 10% krahasuar me një vit më parë. Oferta më e lartë e bankave dhe normat e ulëta të interesit kanë nxitur huadhënien si në kredinë për blerje banesash, ashtu edhe në atë konsumatore.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.