Kredimarrësit e prekur nga tërmeti- Bankat propozojnë ristrukturim pa kosto shtesë!
Sistemi bankar propozon hartimin e një plani masash për të lehtësuar kredimarrësit e prekur nga tërmeti, përmes ristrukturimit të huave, pa aplikuar kosto shtesë. Gjatë një takimi me Guvernatorin e Bankës së Shqipërisë, Gent Sejko, drejtuesit e bankave shprehën gatishmërinë për të dhënë kontributin e tyre në ndihmë të klientëve që kanë pasur pasoja në pronat e tyre nga tërmeti i datës 26 nëntor. Drejtuesit e bankave tregtare u shprehën se kanë bërë vlerësimin e situatës së krijuar në qytetet e dëmtuara nga tërmeti dhe, pavarësisht dëmtimeve të disa mjediseve në zona të caktuara, janë angazhuar për vazhdimin normal të ofrimit të të gjitha shërbimeve të nevojshme financiare. Ata theksuan se po vlerësojnë individualisht të gjithë klientët e tyre kredimarrës të prekur nga tërmeti, për të pasur një panoramë më të qartë të situatës.Po ashtu, drejtuesit e bankave theksuan se në shenjë solidariteti, secila bankë po vlerëson individualisht mundësinë për të kontribuar me donacione të formave të ndryshme, në ndihme të familjeve të prekura nga kjo ngjarje.
Sipas njoftimit të Bankës së Shqipërisë, në takimin e ditës së martë u diskutuan e ndikimeve të tërmetit në ekonomi, sistemin financiar, si dhe masave për t’u ndërmarrë nga sistemi bankar.
Guvernatori Sejko theksoi se parësor mbetet angazhimi maksimal i bankave tregtare për vijimin e veprimtarisë së tyre të plotë operacionale, me qëllim ofrimin e të gjitha produkteve dhe shërbimeve financiare.
Ai u kërkoi bankave t’u vijnë në ndihmë klientëve të tyre të prekur nga kjo fatkeqësi natyrore, duke u ofruar të gjitha lehtësitë e mundshme, si nëpërmjet rishikimit të kushteve të marrëdhënieve ekzistuese, ashtu edhe trajtimit të kujdesshëm të kërkesave të tyre në të ardhmen.
Lidhur me vlerësimin e situatës, Guvernatori iu kërkoi bankave analizimin sa më të shpejtë të impaktit në cilësinë e portofoleve respektive të kredive dhe u bëri thirrje të shikojnë të gjitha mundësitë, që pasojat e kësaj ngjarjeje të rëndë të mos shkaktojnë ngadalësim në ritmin e kreditimit të ekonomisë.
Gjithashtu ai iu kërkoi bankave ofrimin e asistencës dhe bashkëpunimit të plotë për të gjithë ata klientë kredimarrës të prekur nga dëmet e tërmetit, në marrëdhëniet me kompanitë e sigurimit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.