Kreditë e familjeve, për konsum – Banka Kombëtare e Austrisë: Shqipëria pranë ekonomive të zhvilluara
Thuajse 2/3 e kredive që marrin familjet shqiptare janë kredi për konsum, thotë një studim i fundit i Bankës Kombëtare të Austrisë.
Norma fiksohet në 68% dhe ndër vendet e Europës qendrore dhe lindore është e dyta më e lartë pas Çekisë, ku fiksohet në 74%. Vetë Banka Kombëtare e Austrisë e evidenton këtë edhe mes rreshtave, duke nënvizuar faktin se, vlerat për Shqipërinë dhe Çekinë janë pranë atyre të ekonomive më të avancuara të botës. Të dhënat tregojnë gjithashtu se, kredia për konsum është ulur lehtë që prej vitit 2012, kur zinte 71%.
Në një kohë që kredia për konsum është ulur, ajo për shtëpi është rritur lehtë, nga rreth 24%, në rreth 27% të totalit. Pjesa e mbetur ndërkohë është kredi për gjëra të tjera, por që zë një pjesë tepër të vogël të totalit. Për vende si Maqedonia e Veriut apo Bosnje Hercegovina kreditë për konsum të familjeve zënë rreth 20% të totalit. Banka Kombëtare e Austrisë nënvizon faktin se në të gjithë Europën pas viteve 2000 tendenca është thuajse e njëjtë, me kredinë konsumatore në tkurrje.
Të dhënat tregojnë gjithashtu se, maturimi mesatar i kredisë familjare afat-shkurtër, që në pjesën dërrmuese i referohet asaj për konsum, fiksohet në diçka më pak se 6 vite.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.