Kreditë me probleme – 11.4% në fund të muajit shkurt
Niveli i kredive me probleme ishte i qëndrueshëm edhe për muajin shkurt. Sipas Bankës së Shqipërisë, ky tregues rezultoi në nivelin 11.4%, nga 11.3% që ishte në janar. Megjithë një rritje të lehtë që nga fundi i vitit të kaluar, raporti i kredive me probleme ngelet pranë niveleve më të ulëta në afërsisht një dekadë. Përpjekjet e bankave në vitet e fundit e kanë çuar këtë tregues në nivele më të pranueshme.
Nxjerrja nga bilanci e kredive të humbura ka dhënë ndikimin kryesor, e gërshetuar edhe me një kujdes të shtuar në kredidhënien e re. Sipas bankierëve, situata është më e menaxhueshme dhe kreditë me probleme nuk janë më një faktor madhor për frenimin e kreditimit të ekonomisë. Megjithatë, Banka e Shqipërisë ka theksuar nevojën për masa të reja që do ta normalizonin përfundimisht raportin e kredive me probleme në nivele të ulëta njëshifrore.
Burimi: Banka e Shqipërisë
Bankat nxiten për një përdorim më efikas të ristrukturimit të kredive, që në fakt vitin e kaluar janë përdorur më shumë dhe me rezultate më të mira. Por, një faktor thelbësor, që nuk ka dhënë kontributin e pritshëm në uljen e raportit të kredive me probleme, është rritja e kredisë së re. Një rritje e portofolit të kredisë do të ulte peshën specifike të kredive të këqija në bilance. Vitin e kaluar huadhënia u shfaq e ngadaltë, por në muajt e parë të këtij viti shifrat janë më inkurajuese. Për dy muajt e parë të vitit, portofoli i kredisë u rrit me 9 miliardë lekë ose rreth 72 milionë euro.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.