Kreditë me probleme – Të qendrueshme për vitin 2018, 13.5% në prill
Raporti i kredive me probleme në muajt e parë të këtij viti është stabilizuar mes nivelit 13% dhe 14%. Sipas të dhënave nga Banka e Shqipërisë, në fund të muajit prill, raporti i kredive me probleme ishte 13.5%, ndërkohë që në mars kishte qenë 13.4%. Në katër muajt e parë të vitit 2018 ky tregues nuk ka pësuar luhatje domethënëse. Krahasuar me të njëjtën periudhë të një viti më parë, raporti i kredive me probleme ka rënë me rreth tre pikë përqindjeje.
Ndonëse niveli i kredive me probleme ngelet ende i lartë, përpjekjet e viteve të fundit kanë dhënë rezultate të mira dhe ky tregues ka zbritur në nivelet e vitit 2011. Rënia ka ardhur nga nxjerrja jashtë bilancit e kredive tashmë të humbura, nga përdorimi më efikas i instrumentit të ristrukturimit dhe nga një përmirësim i pjesshëm në procesin ligjor të ekzekutimit të kolateralit.
Një ndikim ka dhënë edhe cilësia më e mirë e kredisë së re dhe qasja shumë e kujdesshme e bankave gjatë viteve të fundit. Megjithatë, problemi ngelet rritja ende e pamjaftueshme sasiore e portofolit të kredisë, çka do të ulte peshën specifike të kredive problematike ekzistuese. Portofoli i kredisë për ekonominë ka vlerën e rreth 546 miliardë lekëve, në nivele pothuajse të njëjta me një vit më parë.
Performanca e bankave ngelet pozitive dhe kthimi nga kapitali, si raport i fitimit me kapitalin aksioner, për prillin ishte 12.4%. Shumica e bankave janë fitimprurëse, megjithatë treguesit e përfitueshmërisë shfaqin diferenca të konsiderueshme mes bankave të ndryshme.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.