Kreditë me probleme – Zbresin në 15.9%, niveli më i ulët në 6 vjet
Raporti i kredive me probleme në muajin maj preku nivelin më të ulët të gjashtë viteve të fundit. Sipas të dhënave nga Banka e Shqipërisë, kreditë me probleme përbënin 15.9% të totalit, nga 16.6% që kishin qenë në fund të prillit.
Kreditë me probleme nuk zbrisnin poshtë kufirit të 16% që nga maji i vitit 2011. Përpjekjet dhe masat e viteve të fundit më në fund të japin rezultate të qëndrueshme në uljen e nivelit të kredive me probleme.
Masa me peshën kryesore ka qenë ajo për pastrimin e bilanceve nga kreditë e klasifikuara si të humbura prej më shumë se tre vjetësh. Megjithatë, sipas analizave të Bankës së Shqipërisë, një efekt pozitiv kanë pasur edhe ristrukturimet e kredive si edhe përmirësimet në procesin e ekzekutimit të kolateralit.
Një faktor thelbësor për të ulur më tej peshën e kredive të këqija do të ishte rritja e huadhënies, por, për momentin, shifrat tregojnë se kreditimi ngelet i ngadaltë.
Bankat po shfaqen ende konservatore, sidomos në kreditimin e biznesit, ndërkohë që kërkesa e sektorit privat ende nuk është e konsoliduar, megjithëse në përmirësim.
Rritja e kreditimit është elementi që duket se bart rezervat më të mëdha për të siguruar që raporti i kredive me probleme të bjerë më tej. Ndërkohë, Banka e Shqipërisë po vijon me ndërmarrjen e masave të reja në drejtim të uljes së nivelit të kredive me probleme.
Projekti më i ri është krijimi një platforme për trajtimin e ekspozimeve të mëdha, të përbashkëta, nga ana e bankave.
Deri tani, këto raste janë trajtuar përmes marrëveshjeve me baza vullnetare mes bankave, por marrëveshjet jo gjithnjë kanë funksionuar, sepse jo të gjitha palët kanë miratuar zgjidhjet e propozuara.
Krijimi i një platforme të përbashkët do ta bëjë praktikisht të detyrueshme për të gjitha bankat zgjidhjen që do të propozohet nga një komitet i përbashkët i kreditorëve.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.