Kreditimi “zgjat” hapin – Rritja vjetore në fund të shtatorit arriti në 5.7%

Kreditimi i ekonomisë po rritet me ritme më të larta muaj pas muaji. Sipas Bankës së Shqipërisë, gjatë shtatorit, portofoli i kredisë u zgjerua më tej me rreth 5 miliardë lekë. Në total, ai arriti vlerën e 565 miliardë lekëve, 5.7% më shumë krahasuar me shtatorin e vitit të kaluar.

Portofoli i huas bankare ka prekur vlerën më të lartë në pesë vitet e fundit. Përcaktuese në kthesën e kreditimit ka qenë rritja në segmentin e biznesit, rritje që vazhdoi edhe gjatë shtatorit, duke e çuar portofolin e këtij segmenti në vlerën e 335 miliardë lekëve.

Kredia për biznesin gjeneron volume më të mëdha dhe përbën rreth 59% të portofolit total të huas për ekonominë. Veç rritjes së huadhënies së re, një ndikim të rëndësishëm ka pasur pakësimi i fshirjes së kredive. Që nga viti 2015, bankat kanë nxjerrë nga bilancet fshirë mbi 57 miliardë lekë kredi të humbura.

Kjo ka ndikuar në uljen e raportit të kredive me probleme, por, nga ana tjetër, ka pasur një efekt gërryes në përmasën e portofolit të kredisë, sidomos për bizneset.

Megjithatë, duke filluar nga viti i ardhshëm, banka e Shqipërisë ka vendosur të shkurtojë afatin për fshirjen e kredive të humbura, nga tre vjet në dy vjet. Kjo mund të rikthejë rritjen e fshirjes së kredive, çka mund ngadalësojë rritjen e portofolit të kredisë për ekonominë.

Ndërkohë, në segmentin e individëve, kreditimi po vijon tendencën pozitive të nisur prej disa vitesh. Në fund të shtatorit, huaja bankare në këtë segment arriti në 194.4 miliardë lekë, në rritje vjetore me 6%. Tipar tjetër që ka ndikuar në rritjen e portofolit të kredisë është orientimi i huas drejt afateve më të gjata të maturimit.

Koha më e gjatë mesatare e maturimit të kredive e bën rritjen më të qëndrueshme në kohë. Një ndikim pozitiv ka dhënë edhe stabilizimi i kursit të këmbimit. Vitin e kaluar, zhvlerësimi i euros kundrejt lekut pati dhënë një efekt të konsiderueshëm statistikor në pjesën e portofolit të kredisë së dhënë në valutë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.