Krerët e shtetit, sot jashtë Shqipërisë! Presidenti Meta vizitë në Kosovë, kryeministri Rama në Itali
Presidenti i Republikës, Ilir Meta nisi sot një vizitë shtetërore dyditore në Republikën e Kosovës me ftesë të homologut të Tij, Hashim Thaçi.
Referuar njoftimit zyrtar të Presidencës, Meta do të zhvillojë takim kokë më kokë me Presidentin Thaci, më pas do të kryesojë bisedimet dypalëshe mes delegacioneve respektive zyrtare, ndërsa do të takohet edhe me Kryeministrin Ramush Haradinaj, me Kryetarin e Kuvendit Kadri Veseli dhe Zëvendëskryeministrin e Parë dhe Ministrin e Jashtëm Behgjet Pacolli.
Vizita e parë shtetërore e Presidentit të Republikës së Shqipërisë në Kosovë përmban edhe takimi me krerët e partive parlamentare si dhe homazhe te Varri i Presidentit Ibrahim Rugova dhe në Kompleksin e Memorialit “Adem Jashari” në Prekaz-Skënderaj. Ndërkohë, edhe kryeministri Edi Rama ndodhet në vizitë zyrtare jashtë Shqipërisë. Ditën e sotme ai nis vizitë zyrtare në Itali, ku pritet të takohet me homologun italian Gentiloni. Dy kryeministrat pritet të mbajnë edhe një konferencë të përbashkët për mediat.
Temë e diskutimeve pritet të jetë partneriteti mes dy vendeve, marrëdhëniet ekonomike dhe projektet e përbashkëta dhe çështjet e sigurisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.