Kreu i PD, Basha vijon turin e takimeve: “Do të ulim taksat. Punësimi i të rinjve dhe mbështetja e sipërmarrësve prioritet kryesor”

Kryetari i Partisë Demokratike Lulzim Basha ka vijuar me turin e takimeve nëpër Shqipëri për të prezantuar platformën ekonomike që sipas tij ofron një alternativë më të mirë se ajo e qeverisë aktuale.

Në Kamëz, ku ndodhej kësaj here, kryedemokrati ka përsëritur nevojën që vendi ka për një qeveri normale që i krijon mundësi qytetarëve të punojnë dhe jetojnë.

Ulja e fuqisë blerëse dhe taksat e larta janë dy nga problematikat kryesore që Basha thekson se shfaqen si më të rrezikshmet në bashkëbisedimet me sipërmarrësit.

Kësaj radhe kryetari i PD-së ka zbuluar edhe planin e tij për të pamundurit:

“Buxheti i Shtetit do t’ju mundësojë bukë, ujë dhe drita siç bën çdo qeveri e përgjegjshme sot në botë” – është shprehur ai për shtresat më në nevojë.

Më tej, z.Basha theksoi nevojën që ka vendi për uljen e taksave në mënyrë që paratë e individëve të mos shkojnë në drejtim të gabuar, por të kthehen në investime dhe rritje pagash.

Sipas, kreut të opozitës Shqipëria ka nevojë që të kthehet më atraktive se vendet fiqnje për thithjen e investimeve të huaja:

“Ne do ta bëjmë Shqipërinë vend tërheqës për investitorët e huaj që mundësojnë vende pune. Nën qeverisjen tonë ata nuk do të përzgjedhin më Maqedoninë e Veriut e Serbinë, siç po ndodh sot.

Mbështetja e sipërmarrësve të rinj dhe punësimi i të rinjve do të jetë ndër prioritetet kryesore të miat dhe të Partisë Demokratike.” – është zotëruar kryedemokrati.

G.K / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.