Krijohet banka më e madhe në Spanjë. Caixabank blen Bankia për 4.3 mld euro. Konsolidim përballë Covid-19

Caixabank ka rënë dakord të blejë Bankia për 4.3 miliardë euro, në një marrëveshje që përfshin vetëm aksione dhe që do krijojë huadhënësin më të madh vendas në Spanjë.  Kjo jep gjithashtu një sinjal që konsolidimi tek bankat me vështirësi në Europë po rifiton vrull. Shkrirja do të krijojë bankën më të madhe vendase matur nga aktivet, me një vlerë tregu të bashkuar prej mbi 16 miliardë euro.  Marrëveshja do të sjellë shkurtime vjetore të kostove me 770 milionë euro, sipas deklaratës së bankave.  Kjo vjen ndërkohë që koronavirusi ka vendosur nën presion bankat europiane që të bashkojnë fuqitë, për t’i bërë ballë rritjes së kredive të këqija dhe normave rekord të ulëta të interest.

Intesa Sanpaolo në Itali do të blejë Unione di Banche Italiane dhe Sabadell në Spanjë ka zhvilluar bisedime informale për një shkrirje.   Dy bankat spanjolle nuk bënë të ditur se sa vende pune apo degë do të humbasin, por sindikata kryesore shqetësohet se do të ketë shkurtime të mëdha nga një bankë me 6,300 degë dhe mbi 51,000 persona staf në Spanjë.  Marrëveshja është përshkruar si një shkrirje, por është një fakt një blerje nga Caixabank, pasi është thuajse 3 herë më e madhe në vlerë tregu se Bankia dhe thuajse 2 herë më e madhe matur nga aktivet. Caixabank do të këmbejë 0.6845 aksione të reja për çdo aksion të Bankia, duke e vlerësuar atë në 1.41 euro për aksion.

Kjo vlerë është 20% më e lartë se çmimi i Bankia më 3 Shtator, përpara lajmërimit të shkrirjes.  Në lidhje me bashkimin, bankat kanë deklaruar se presin kursime vjetore të kostove me 770 milionë euro deri në 2023, si dhe të ardhura të reja vjetore prej rreth 290 milionë euro në 5 vite.  Ato presin 2.2 miliardë euro tarifa ristrukturimi vitin e ardhshëm. Bankat presin një raport të kapitalit bazë(Tier-1) ndaj aktiveve të ponderuara me risk në 11.3% në tremujorin e parë pas transaksionit.   Aksionerët e Caixabank do kenë fillimisht 74.2% të kapitalit të entit të ri, ndërsa Bankia do zotërojë 25.8%.  Bankia është shpëtuar nga shteti me 22.4 miliardë euro në vitin 2012, në kulm të krizës financiare të Spanjës.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.