Krimi dhe pastrimi i parave, Rama: Ekspertë ndërkombëtarë do të vendosen në kryeqytet
Strukturat ligjzbatuese shqiptare do të asistohen nga ekspertë ndërkombëtarë në luftën kundër pastrimit të parave, krimit të organizuar dhe korrupsionit.
Kryeministri Edi Rama tha se këta ekspertë do të vendosen në Tiranë dhe se bashkëpunimi me ta do garantojë rezultate konkrete në luftën kundër krimit e pastrimit të parave.
“Një ekip i gjerë gjermano-amerikan ekspertësh do të vendoset këtu në Shqipëri dhe do të punojë ngushtësisht me strukturat e hetimit të Ministrisë së Financave, Hetimit Tatimor dhe Doganor dhe Strukturën e Krimit Ekonomik të Policisë së Shtetit për të mundësuar çeljen e një procesi pune të përbashkët me një metodologji bashkëkohore dhe të sofistikuar dhe rritjen e kapaciteteve të këtyre agjencive në goditjen e një fenomeni me të cilin është koha të merremi dhe më thellësisht pasi kemi shënuar dhe disa rezultate të rëndësishme”.
Deklaratat e Kryeministrit u bënë gjatë nënshkrimit të marrëveshjes mes Ministrisë së Brendshme dhe asaj të financave me firmën ERNST & Young për bashkëpunim në luftën kundër krimit dhe evazionit.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.