Kritikat e FMN për PPP-të, Preçi: Qeveria t’i rikthehet mënyrës tradicionale të investimeve
Deklarata kritike e Fondit Monetar Ndërkombëtar sa i përket zhvillimeve ekonomike në Shqipëri, duke u përqendruar më së shumti në mënyrën e dhënies së Partneriteteve Publike Private, duhet të vlerësohet me seriozitet nga qeveria.
Në një intervistë për TV SCAN, Drejtori Ekzekutiv i Qendrës Shqiptare për Kërkime Ekonomike, Zef Preçi, thekson se të gjitha kritikat e FMN-së janë të drejta dhe sugjeron që ato të kthehen në një program të mirëfilltë reformash.
Sipas ekspertit të ekonomisë, qeveria duhet ti kthehet mënyrës tradicionale të investimeve, duke hequr dorë nga praktikat e propozimeve të pakërkuara.
Një ditë më parë, FMN vuri theksin tek PPP-të, duke kërkuar nga qeveria pakësimin e vendimmarrjeve të fragmentuara dhe fuqizimi i proceseve të vlerësimit të riskut brenda Ministrisë së Financave.
FMN kërkoi gjithashtu që qeveria të hartojë një plan për krijimin e një banke zhvillimi për të financuar investimet publike duke marrë parasysh përvojën ndërkombëtare.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.