Kriza e emigrantëve – Koalicioni i Merkel dështon të arrijë një dakordësi përpara samitit

Partitë në koalicion të kancelares gjermane Angela Merkel dështuan të zgjidhin çështjet e lidhura me politikat e emigrantëve, që kërcënojnë prishjen e qeverisë së saj të formuar përpara 3 muajsh.  Konflikti lidhet me planet e hartuara nga ministri i Brendshëm Horst Seehofer, kreu i Unionit Kristian Social,  për të kthyer mbrapsht në kufijtë gjermanë, emigrantët që janë regjistruar në vende të tjera të Bashkimit Europian.   Kjo përbën një sfidë për Merkel pasi cënon politikat e saj të dyerve të hapura për emigrantët.

Ndërkohë që shumë vende europiane ndodhen në vështirësi me përballimin e fluksit të emigrantëve, CSU i ka dhënë Merkel kohë deri në fund të kësaj jave ku zhvillohet samiti i Bashkimit Europian, për të rënë dakord me vendet e BE që të reduktohet barra për Gjermaninë.  CSU po ushtron presion ndaj Merkel që të arrijë një marrëveshje europiane, ose të paktën dakordësi dypalëshe me vende si Greqia apo Italia. “Në javën e ardhshme ne kërkojmë që emigrantët të refuzohen në kufij nëse janë regjistruar në vende të tjera europiane dhe duhet të ktehen në procedurat për azil atje”, sipas deputetit të Unionit Kristian Social, Alexander Dobrindt.

Nëse Seehofer vazhdon me planet e tij, anëtarët e Unionit Kristian Demokrat thonë se ajo do të detyrohet që ta pushojë.  Kjo do të sillte prishjen e aleancës 70-vjeçare mes CDU/CSU dhe t’i heqë shumicën në parlament Merkel.   Megjithatë, sipas burimeve të CSU,  synimi i tyre nuk është prishja e qeverisë së Merkel,  pavarësisht se nuk heqin dorë nga plani.  Politikat e dyerve të hapura për emigrantët, që kanë sjellë 1.6 milionë në Gjermani që prej fillimit të 2015-ës, fajësohen edhe për ngritjen e partisë së djathtë ekstreme AfD, që luan tashmë rolin e opozitës.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.