Kriza e gazit në Evropë shtyn minatorët polakë të qymyrit të protestojnë për pagat e ulëta!

Minatorët polakë të qymyrit po bëjnë një bllokadë për shkak se sipas tyre pagat janë të pamjaftueshme pasi u është dashur të rrisin orët e punës për të zbutur ndikimin e krizës energjetike që ka kapluar vendin dhe Europën. Bllokada dyditore filloi në orën 07:00 me orën lokale të së martës me minatorët që bllokuan hyrjen e dërgesave të qymyrit në termocentrale.

Bllokada, tha sindikata, ka për qëllim vetëm të ndikojë në furnizimin me energji elektrike për industrinë dhe jo qytetarët. Kjo vjen pasi çmimet europiane të gazit u rritën me 30% të martën për shkak të furnizimeve të ulëta nga Rusia me çmimet standarde të gazit tani më shumë se pesë herë më të larta se sa ishin në janar 2021.

Të dhënat nga operatori gjerman i rrjetit Gascade treguan se flukset e gazit përmes tubacionit Yamal – që lidh Rusinë me Gjermaninë nëpërmjet Bjellorusisë – u hodhën në drejtim të lindjes të martën, ndërsa Gjermania dërgoi gaz në Poloni për të 15-ën ditë radhazi, në vend që ta dërgonte atë drejt Europës Perëndimore. Furnizimet e gazit rus nga Ukraina në Sllovaki u ulën gjithashtu.

Disa ligjvënës të Bashkimit Europian kanë akuzuar Rusinë, e cila furnizon më shumë se 40% të gazit natyror të bllokut, për përdorimin e krizës si levë. Vendi ka vendosur dhjetëra mijëra trupa përgjatë kufirit me Ukrainën – përmes të cilit kalon pjesa më e madhe e gazit rus që furnizon Europën – dhe ka kërkuar që Kievi të heqë dorë nga çdo aspiratë për t’u bashkuar me NATO-n.

Ajo gjithashtu ka hedhur poshtë akuzat e eurodeputetëve se po kufizon flukset e gazit në Europë në një përpjekje për të siguruar miratimin për tubacionin e përfunduar Nord Stream 2, i cili do të dërgojë gaz në Gjermani përmes Detit Baltik, duke anashkaluar kështu Ukrainën.

Moska ka mohuar akuzat se po përgatitet për të pushtuar Ukrainën dhe thotë se tubacioni i sapondërtuar do të nxisë eksportet e gazit dhe do të ndihmojë në zbutjen e çmimeve të larta në Europë. Ajo ka thënë gjithashtu se po përmbush detyrimet e saj kontraktuale për dërgesat e gazit.

Në vend të kësaj, presidenti rus Vladimir Putin fajësoi importuesit gjermanë të gazit për çmimet në rritje muajin e kaluar duke argumentuar se Gjermania po rishiste gazin rus në Poloni dhe Ukrainë në vend që të lehtësonte një treg të mbinxehur. Ministrat e jashtëm të NATO-s janë planifikuar të takohen virtualisht të premten përpara një takimi javën e ardhshme me zyrtarët rusë, të cilët do të zhvillojnë gjithashtu bisedime me SHBA-në.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.