Kriza e Madhe Japoneze për patatina – 12 dollarë një qese në ankand

Kërkesat për patatina në Japoni janë shtuar këtë javë dhe çmimet për produktet janë rritur deri në 6 herë më shumë, pasi kompania japoneze e ushqimeve Calbee Inc. ndali shitjet e disa prej patatinave të saj më të kërkuara.

Situata shkoi në atë pikë, saqë patatinat me shije pice filluan të shiten në ankande online për 1250 jen, nga çmimi normal prej 200 jen. Nëpër rrjete sociale u bënë popullore foto të supermarketeve me raftet e boshatisur.

Kompania japoneze njoftoi ndalimin e shitjes së mbi 15 lloje patatinash për shkak të të korrave të këqija në Hokkaido, një rajon kyç për prodhimin e patateve. Calbee ka një vlerë në treg prej 4,6 miliardë dollarësh dhe zotërohet pjesërisht nga Pepsi (20%). Kompania zë 73% të tregut të patatinave në Japoni.

Patatinat janë diçka me rëndësi në Japoni, dhe renditen si ushqimi i preferuar “snack” nëpër anketa.

Ndonëse kriza e patateve u shfaq fillimisht tek patatinat, ajo mund të shtrihet edhe tek fast-food-et dhe restorantet që përdorin patate në menunë e tyre.

Përfaqësues të kompanisë thanë se po bëjnë të pamundurën për të rikthyer shitjet e patatinave, dhe se po konsiderojnë të importojnë më shumë patate nga SHBA si dhe t’u kërkojnë fermerëve të ishullit Kyushu të korrin të mbjellat e tyre më herët këtë vit.

Një shkak tjetër për problemin sipas kompanisë, është edhe limiti i vendosur nga qeveria për sasinë e lejuar të patateve të importit në ushqime. Në të shkuarën, vendi ka përjetuar kriza të ngjashme me produktet e bulmetit si gjalpi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.