Kriza “fal” tregtinë e jashtme. Rënie mjaft e lehtë e eksporteve dhe importeve, rekord importi i produkteve farmaceutike
Nga ‘SCAN INTELLIGENCE UNIT’
Shifrat më të fundit nga Instituti i Statistikave (INSTAT) sa i përket tregtisë së jashtme, tregojnë se vlera e eksporteve të mallrave gjatë tetorit të këtij viti preku shifrën e 27 miliardë lekëve, në rënie me 0.9% krahasuar me të njëjtën periudhë të një viti më parë, ndërkohë që importet ishin në 59 miliardë lekë, në rënie me vetëm 0.01% krahasuar me tetorin e vitit të kaluar. Defiçiti tregtar rezulton kështu në 33 miliardë lekë, në rënie me 0.8% krahasuar me të njëjtën periudhë të një viti më parë. Të dhënat e Institutit të Statistikave sinjalizojnë se, pavarësisht rënies së lehtë gjatë tetorit, tregtia e jashtme vijon tendencën e shtatorit, pra të rimëkëmbjes pas krizës.
Sa i përket 10 muajve të këtij viti, të dhënat tregojnë se, eksportet e mallrave arritën vlerën e 221 miliardë lekë, duke u ulur me 12,2% krahasuar me një vit më parë dhe importet e mallrave arritën vlerën e 488 miliardë lekëve, në rënie me 9,7% krahasuar me një vit më parë. Defiçiti tregtar arriti vlerën e 267 miliardë lekëve, duke u ulur me 7.6%, krahasuar me të njëjtën periudhë të 2019-ës.
Sa i përket mallrave, ushqimet kanë dhënë kontributin më pozitiv në rritjen e eksporteve ndërsa mineralet djegëse, kontributin më negative. Në drejtim të importeve, vijojnë të jenë mineralet djegëse ato që kanë dhënë kontributin më negativ, ndërkohë që makineritë kanë dhënë kontributin më të lartë.
Ecuria e importit të produkteve farmaceutike
Shifrat tregojnë gjithashtu se importet e produkteve farmaceutike janë rritur me 13.9% krahasuar me tetorin e vitit të kaluar dhe me 50.8% krahasuar me muajin shtator. Madje, importi i produkteve farmaceutike gjatë muajit të kaluar ka prekur rekordin e tretë më të lartë mujor në histori, me 2.7 miliardë lekë.
Sa i përket vendeve partnere, tetori regjistron rritje të ndjeshme të eksporteve drejt Kosovës, me 9.7 %, Gjermanisë me 63.0%, dhe Greqisë me 22.4%. Italia me -0.6%, Spanja me -62.5%, dhe Kina me -11.1 % regjistrojnë uljen më të madhe të eksporteve gjatë muajit të kaluar. Sa i përket importeve, tetori ka sjellë një rritje nga Italia, me 9%, Greqia me 17.6% dhe Gjermania me 24%, si dhe një ulje nga Turqia me -16.2%, Serbia me -3.2% dhe Zvicra me -35.1%.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.