Kriza politike në Maqedoni – Të huajt dënojnë veprimin e Ivanov
Ambasadori Amerikan në Maqedoni Jess Baily ka reaguar për mosdhënien e mandatit nga Ivanov drejt Zaev për formimin e qeverisë.
Diplomati amerikan shprehet në një postim në Twitter “i shqetësuar sepse Maqedonia po largohet nga parimet e demokracisë dhe sundimit të ligjit, vlera bazë të NATO-s”.
Ndërkohë në Shkup pritet sot edhe vizita e përfaqësueses së Bashkimit Europian për Marrëdhëniet me Jashtë dhe Sigurinë, Federica Mogherini. Mogherini pritet t’i bashkohet zërave nga bashkësia ndërkombëtare që dënojnë veprimin e Ivanov.
Më herët komisioneri Johanes Hahn deklaroi se të gjithë liderët, përfshirë Presidentin, duhet të respektojnë rezultatin e zgjedhjeve.
Ndërkohë në deklaratën e djeshme Ivanov mohoi mandatin për Zaev me justifikimin se ai ka pranuar platformën shqiptare, e cila cënon sovranitetin e vendit.
“Deri sa të jem unë President i Maqedonisë, nuk do t’i jap mandatin asnjë njeriu dhe asnjë partie politike, që në programin e saj ka një platformë e cila rrënon sovranitetin, integritetin territorial dhe pavarësinë e Maqedonisë”, u shpreh Ivanov.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.