Kryebashkiaku Veliaj në TEDx Prishtina -“Njerëzit janë protagonistë të ndryshimit që po ndodh në qytetin e tyre”
Eventet TEDx janë shumë të njohura në botë dhe organizohen çdo vit duke bërë bashkë njerëz të njohur politikanë, studiues, muzikantë, shkencëtarë, arkitektë etj, të cilët me fjalimet e tyre frymëzuese sjellin eksperienca të ndryshme për çështje të ndryshme.
Në eventin TEDx Prishtina si i ftuar special gjatë ditës së sotme ishte Kryebashkiaku Veliaj i cili zgjodhi pesë histori njerëzore për të rrëfyer transformimin që ka pësuar kryeqyteti në këto dy vite.
Kryebashkiaku tha se ndryshimet që po ndodhin në Tiranë do të vijojnë me të njëjtin ritëm, ndërsa e cilësoi punën në bashki si një nga më të bukurat që mund të bëjë një njeri në jetë.
Në fjalën e tij, Veliaj gjithashtu tha se qyteti nuk është thjesht infrastrukturë, por janë njerëzit ata që i japin jetë atij, e në këto dy vitet e fundit qytetarët e thjeshtë po bëhen protagonistë të transformimit që po ndodh në kryeqytetin shqiptar.
Veliaj u ndal tek një nga investimet më të bukura që ka ndryshuar tërësisht një nga zonat më të vjetra të Tiranës, sikurse është Pazari i ri.
Veliaj tha se pavarësisht se në shumë prej projekteve të realizuara gjithmonë ka pasur debate, në fund të gjithë janë bindur se ndryshimi ka qenë i nevojshëm dhe i duhuri.
Ai e ilustroi me shembullin e suksesshëm të ndërtimit të këndit të parë të lojërave në kryeqytet, pranë Parkut të Liqenit Artificial, ku fillimisht u kundërshtua dhe sot është një nga ambientet më të vizituara në Tiranë.
Tirana është një qytet i njohur për ndërtesat shumëngjyrëshe, ku ridekorimi i pallateve të vjetra nga artistët më të mirë të pikturave murale, i japin qytetit atmosferë pozitive duke e kthyer atë një qytet unik dhe tërheqës. Veliaj tha se falë edhe këtyre ngjyrave, Tirana është kthyer në një atraksion për mjaft grupe turistike.
“Sot, Tirana është e pushtuar nga ngjyrat. Sot ka kompani turistike që ofrojnë ture të specializuara vetëm për të parë grafitit ose pallatet e vjetra e të reja që janë bërë, duke u kthyer në një produkt turistik, ku siç janë ata që ndjekin turizmin komunist dhe të luftës së ftohtë, ashtu është kthyer në një nga hapësirat më të instragramuara të qytetit dhe turi që qyteti gjeneron, qoftë edhe me ekonominë e ngjyrave”, u shpreh ai.
Kreu i Bashkisë solli në vëmendje edhe disa prej projekteve më të suksesshme që kanë sjellë një ndryshim të prekshëm në kryeqytet, sikurse janë mbështetja sociale apo përmirësimi i infrastrukturës në komunitet, shkolla e çerdhe, edhe falë bashkëpunimit me donatorë të ndryshëm. Sipas tij, Bashkia e Tiranës ka ndërmarrë me sukses nismën për hapjen e qëndrës së emergjencave si dhe për programin e banesave sociale ku përfitojnë realisht ata që kanë më shumë nevojë.
Kreu i Bashkisë u shpreh se falë këtij kontributi, është rritur dëshira dhe vullneti i atyre që dëshirojnë të kontribuojnë duke investuar në të mirë të komunitetit.
“Një pjesë e madhe e çerdheve, kopshteve, shkollave të Tiranës në fakt bëhet me fonde e financime private. Kemi një garë sot mes bizneseve se kush investon më shumë për të adoptuar një çerdhe, kopësht, kush po merr përsipër një kënd lojërash. Në total, në një vit, nëse do kishim një shifër financiare, 6 milionë euro në qytetin e Tiranës kanë ardhur vetëm nga filantropia, që disa herë është modeste si e Thanasit, e disa herë është gjigante si e atyre që bëjnë çerdhe, kopshte e shkolla të reja ”, përfundoi Veliaj fjalën në TEDx.
V.Hydi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.