Kryeministri Conte: Italia do të respektojë rregullat për të shmangur sanksionet e BE

Kryeministri Giuseppe Conte tha të mërkurën se Italia do të respektojë rregullat fiskale të Bashkimit Europian dhe është e vendosur të shmangë masat disiplinore ndaj borxhit në rritje të Romës. Gjithashtu në fjalën e tij ai kërkoi që komisioneri i Italisë në ekzekutivin e ardhshëm të BE-së duhet të ketë një punë të rëndësishme ekonomike.

Duke ju drejtuar Dhomës së Deputetëve përpara samitit të BE që do të zhvillohet këtë javë, Conte tha se qeveria e tij do të përpiqej të merrte “një portofol ekonomik të klasit të parë”. Mandati i Komisionit Europian të tanishëm skadon më 31 tetor dhe qeveritë e BE kanë filluar negociatat mbi ekipin e ardhshëm të komisionerëve.

Brukseli ka kërcënuar Italinë me një procedurë që do të kërkonte një mbikëqyrje më të afërt të politikës së saj fiskale dhe përfundimisht do të çonte në gjoba. Ai ankohet se Roma nuk e ka ulur borxhin e saj publik në vitin 2018 siç është premtuar por përkundrazi duket se ky borxh po vazhdon të rritet këtë vit si dhe gjatë atij që vjen, nëse qeveria aktuale nuk miraton masat shtrënguese.

“Ne jemi të vendosur të shmangim një procedurë për shkelje të BE-së dhe jemi të bindur për politikat tona ekonomike”, tha Conte para Dhomës së Deputetëve përpara një samiti të BE këtë javë. “Italia synon të respektojë rregullat e BE,” tha ai, por shtoi se rregullat duhet të rishikohen për të siguruar një “ekuilibër më të mirë midis stabilitetit dhe rritjes ndërmjet uljes së rreziqeve dhe ndarjes së rreziqeve.

Burimi: Reuters

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.