Kryeministri i Holandës sërish kritika ndaj Shqipërisë: “Nuk janë gati për në BE”

“Holanda nuk e kundërshton zgjerimin e BE-së“, tha Kryeministri Mark Rutte, por shprehet se Shqipëria nuk është e gatshme të fillojë bisedimet e pranimit për momentin, ndërsa Maqedonia e Veriut është afër këtij qëllimi.

“Ne nuk besojmë se Shqipëria është e gatshme të fillojë bisedimet me BE në këtë pikë dhe për sa i përket Maqedonisë Veriore, ajo është më afër këtij qëllimi,” tha Rutte për revistën Pobjeda nga Podgorica. Ai shtoi se disa vende nuk e dëshirojnë shkëputjen e dy vendeve.

I pyetur nëse ishte 2025 një afat realist për pranimin e një prej vendeve të Ballkanit Perëndimor në BE, Rutte u përgjigj nuk ishte qëllim në vetvete. “Unë nuk kam asnjë ide. Dhe ky nuk është një qëllim. Ne nuk kemi asgjë kundër zgjerimit të BE-së, por duhet të sigurohemi që të ndjekim rregullat dhe se gjithçka duhet të jetë e rreptë dhe e drejtë. Ky është gjithmonë pozicioni ynë”përfundoi Rutte.

Franca vendosi veton duke bllokuar hapjen e negociatave për Shqipërinë dhe Maqedoninë në samitin e liderëve të BE-së në Tetor të këtij viti, ndërsa këtij vendimi iu bashkua edhe Holanda me Danimarkën.

Shumë prej krerëve të vendeve në Bashkimin Europian janë shprehur se ky vendim është një gabim strategjik i Unionit.

Ndërkohë, presidenti Macron lështë shprehur se BE-ja ka nevojë të reformojë vetveten përpara se të zgjerohet më tej. Gjithashtu Franca ka publikuar edhe dokumentin e ri në të cilin janë rimodeluar kapitujt duke u kthyer në faza për pranimin e shteteve anëtare.

Të gjitha diskutimet e radhës pritet të zhvillohen në samitin e Zagrebit, në maj të 2020-ës midis vendeve të Ballkanit Perëndimor dhe Bashkimit Europian.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.