Kryeministri Italian merret tre orë në pyetje nga prokuroria për menaxhimin e situatës së COVID-19

Prokurorët morën në pyetje kryeministrin italian Giuseppe Conte për rreth tre orë të Premten për menaxhimin e tij të urgjencës së koronavirusit, konfirmoi zyra e tij.

Prokurorët nga Bergamo, qyteti në rajonin verior të Lombardisë ndër më të goditurit nga virusi, kanë filluar një hetim pse dy qytete nuk u përcaktuan të ashtuquajturat “zona të kuqe” më parë në krizë. Kryeprokurorja Maria Cristina Rota dhe ekipi i saj po përpiqen të zbulojnë pse një bllokim nuk u zbatua më herët në urgjencën shëndetësore rreth qyteteve Nembro dhe Alzano në provincën e Bergamos. mEkspertët e shëndetit thonë se nëse zona do të ishte karantinuar më herët, shumë jetë do të ishin shpëtuar.

Conte ka argumentuar se rajonet kishin diskrecion të plotë për të mbyllur zona të caktuara ku virusi kishte filluar të përhapej me shpejtësi në fund të shkurtit dhe fillim të marsit.”Nëse Lombardia do të kishte dashur, mund të kishte bërë zonat e kuqe Alzano dhe Nembro,” tha ai.

Conte vendosi një karantinë mbarëkombëtare në 10 mars. Të enjten, Conte tha se ai i mirëpret hetimet e Bergamos dhe “nuk ishte aspak i shqetësuar”.

“Do të përcaktoj me ndërgjegje të gjitha faktet për të cilat kam njohuri. Të gjitha hetimet janë të mirëseardhura. Qytetarët kanë të drejtë të dinë dhe ne kemi të drejtë të përgjigjemi.” – tha ai.

Ndarë nga hetimi i drejtuar nga Rota, rreth 50 anëtarë të familjes së viktimave të koronavirusit në provincën e Bergamos paraqitën ankesa të mërkurën, aksioni i parë i këtij grupi juridik në Itali, për trajtimin e krizës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.