Kryeministri propozon pakt kombëtar për Europën – Rama: Zgjedhja e kryeprokurorit pikënisje/ Reagon Basha

Kryeministri Edi Rama nëpërmjet një prononcimi për median shqiptare foli mbi Presidencën bullgare të BE-së dhe propozoi gjithashtu një pakt kombëtar për Europën. Rama tha se 6 muajt e ardhshëm janë vendimtarë për hapjen e negociatave për Shqipërinë.

“Ne kemi presidencën bullgare dhe kryeministri bullgar është absolutisht i përfshirë dhe tërësisht i përkushtuar që të japi një shtysë të rëndësishme nga ana e presidencës së Bashkimit Europian në këtë 6 mujor një mbështetje të fortë të kandidaturës së Shqipërisë për çeljen e negociatave,” u shpreh ai.

Ndërkohë, ai ka shtuar më tej se vijon procesi i bashkëveprimit për projektet në fusha si infrastrukturë, energji si dhe në infrastrukturën dixhitale.

Kryeministri ka ftuar opozitën për një pakt kombëtar për Europën në funksion të çeljes së negociatave, ku ka cilësuar si pikënisje zgjedhjen e Prokurorit të Përgjithshëm.

“Ftesa ime është për një pakt kombëtar për Europën, në funksion të çeljes së negociatave si një stacion i Shqipërisë dhe jo i qeverisë vetëm dhe për ta shfrytëzuar këtë çështje të Prokurorit të përgjithshëm si një pikënisje të rëndësishme duke u nisur nga fakti se pavarësisht se ne kemi mundësinë kushtetuese të një zgjedhje me shumicë të thjeshtë, të krijojmë kushtet që të kemi një zgjedhje të mirëkuptuar me opozitën dhe nga ana tjetër që opozita të përfshihet plotësisht në procesin e mbështetjes së Shqipërisë për të çelur negociatat,” tha Rama në fjalën e tij.

Pas deklaratës së kryeministrit, ka reaguar kryetari i Partisë Demokratike, Lulzim Basha nëpërmjet një postimi në profilin e tij në Facebook. Ai tha se pakti i vetëm për të cilën ka nevojë Shqipëria është pakti për Kushtetutën dhe shtetin ligjor. Sa i përket kritereve të vëna nga Bashkimi Europian, Basha u shpreh se ‘i mbështesim pa asnjë kusht.’

“Ne do japim kontributin tonë në Kuvend dhe në institucione për këtë gjë. Por detyra jonë është të bëjmë opozitë, çfarë është rol themelor dhe i domosdoshëm për funksionimin e demokracisë, kufizimin e pushtetit dhe mirëqeverisjen e vendit.”

Sipas tij, Shqipëria nuk duhet të ketë demokraci fasadë dhe mbi Kushtetutën e institucionet nuk duhet të jenë partitë apo tavolinat partiake.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.