Rama në Shkodër: Po disiplinojmë arsimin e lartë. Kritere të njëjta pranimi në Universitetet publike dhe private
Kryeministri Rama ishte i pranishëm në Universitetin e Shkodrës ku ka folur para studentëve dhe pedagogëve për reformën në arsim.
“Ne kemi ndërmarrë një reformë në arsim që po te ishte marrë 20 vite më parë, Shqipëria do të ishte një vend tjetër, pasi ne sot nuk do kishim pasojat dhe plagët e mëdha që hapi arsimi në vend. Ishte vetëm në një korsi, vetëm për arsimin e lartë dhe korsia e arsimit profesional ishte mbyllur. Ai sistem solli një numër të madh të të diplomuarve me diploma pa vlerë dhe me një boshllëk për ekonominë dhe punësimin, për shkak të mungesës së zanateve, duke mos garantuar një punësim të qëndrueshëm. Kjo ishte një humbje e madhe për shumë vite, pasi humbëm kapitalin njerëzor. Në Shqipëri u hapën më shumë Universitete për frymë se sa Britania e Madhe ose Gjermania. Ishin skema financiare ku paguhej për të marrë një diplomë, jo për të marrë dije. Shume prindër i hodhën në lumë investimet për fëmijët e tyre. Shumë të rinj shpenzuar vite dhe energji për t’u futur në radhën e madhe të të papunëve, pasi diplomat e tyre nuk kane asnjë vlerë, por nuk kane asnjë zanat. Kemi vendosur të disiplinojmë arsimin e lartë, pasi mbyllëm 22 universitete, ashtu sikundër janë mbyllur edhe disa fakultete në universitetin publik. Nuk ka një arsim të lartë për fëmijët e nënës dhe një arsim tjetër të lartë për fëmijët e njerkës” tha Rama.
Kryeministri foli edhe për kriteret e pranimit në Institucionet e Arsimit të Lartë në vend.
“Reforma jone bën të mundur atë që u pa edhe me nisjen e vitit akademik, kriteret që duhen përmbushur, si nëse shkon në privat apo në publik, janë të njëjta. Nuk ka asnjë student ne publik dhe privat me mesataren nën 6. Zbatimi na tregon se ku duhet të korrektojmë dhe eksperienca krijon kushte për përmirësime mbi një bazë të shkruar në letër”.
Kreu i kabinetit qeveritar foli edhe për rritjen e kërkesave për formimin profesional.
“Sot kemi 27 mijë kërkesa për formim profesional në Shqipëri, nga 3 mijë që kishim 3 vjet e gjysmë më parë. Si mund t’i punësojmë të rinjtë në një vend kur mungojnë zanatet? Shqipëria është e pasur me naftë, me burime hidroenergjetike, një platformë të qëndrueshme për zhvillimin e turizmit. Pas 25 vitesh nuk kemi njerëz që mund të punësohen në kompanitë e naftës. Këto të fundit i marrin këta persona nga jashtë vendit. Nuk u mendua ngritja e një sistemi profesional sipas kërkesës se turizmit. Kemi një papunësi të lartë të trashëguar dhe duam te rrisim cilësinë e krahut të punës dhe këtë po bëjmë.”
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.