Kryeministri Rama shpjegon se pse zgjodhi Erion Braçen si zëvëndës dhe pse ndryshimet në kabinet i bëri me “ministra teknikë”!

“Të gjithë ministrat e rinj janë më me eksperiencë sesa ata që u larguan ishin në ditën e parë”! Ka qenë kjo përgjigja që kryeministri Edi Rama ka dhënë për gazetarët i pyetur për ndryshimet që ndërmori sëfundmi në kabinetin qeveritar.

“Së pari unë e konsideroj krejtësisht, si ta quaj, humbje kohe, debatin teknik-jo teknik ndërkohë që më kujtohet fare mirë që edhe kur krijuam qeverinë e parë pas fitores së zgjedhjeve në 2013 u kritikova për të njëjtën gjë dhe për disa vite ministrat që u larguan së fundmi konsideroheshin si teknikë. Unë nuk e di këtë dallim. Unë di që Partia Socialiste është më shumë sesa anëtarësia e saj. Unë di që të gjithë ministrat e rinj janë më me eksperincë sesa ata që u larguan ishin në ditën e parë. Të gjithë ata që janë zgjedhur për qeverinë e re janë njerëz që jo vetëm kanë kapacitetet e tyre të padiskutueshme por edhe kanë një sens përkatësie ndaj vizionit, programit të Partisë Socialiste pavarësisht nëse kanë apo nuk kanë kartë anëtarësie. E rëndësishme është që gjithmonë jam prirur të zgjedh shqiptarë të mirë” tha kryeministri.

Sa i përket mundësisë që të përsëritet precedenti me dekretin presidencial në rastin e ministrit të Brendshëm, kryeministri tha se nuk sheh arsye që Presidenti të mos dekretojë ndonjë nga ministrat e rinj.

Ndërkohë, për përzgjedhjen e Erion Braçes  si zëvëndëskryeministër, kryeministri tha se kjo “tregon të kundërtën e asaj qe pretendohet dhe propagandohet nga shumëkush që unë jam një person që dëshiroj të punësoj dhe të rrethohem vetëm nga njerëz që janë dakord me mua në gjithçka”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.